مدونة أبوفلان تقنية ، أخبار ، تجارب شخصية ، مطاعم ، سياحة
.
.
شركة فيفا بالنسبة لي من أفضل شركات الاتصالات في الكويت من ناحية قوة الشبكة والنت وان كان النت أقوى في بداية انطلاقها ثم تغيرت قليلا !
الا أن مايدعوا للهروب من هذه الشركة هو سوء خدمة العملاء عند الإتصال على 102
اتصلت بالأمس على الخدمة لأستفسر عن حجم تصفحي للإنترنت بعد أن اشتركت بخدمة الانترنت على رقمي الفواتير
طلب مني الموظف الرقم السري أو الرقم المدني فأعطيته الرقم السري وانتظرت عشر دقائق حتى أحصل على معلومة موجودة عندي في الآيفون ولكنني أحببت التأكد أكثر !
بعدها انقطع الخط فجأة وعاودت الاتصال بهم وبالتالي تم تحويلي الى موظف آخر لأبدأ معه شرح المطلوب من البداية !
في هذه المره طلبت مني الموظفه الرقم المدني فقط فأخبرتها أن الرقم غير مسجل باسمي ولكن أنا من يستخدمه والرقم السري عندي فقالت : اسمحلي أخي الكريم أبوفلان ما أقدر أخدمك لازم الرقم المدني !
المصيبة في الموضوع أنني قبل شهر ذهبت الى أحد أفرع الشركة لأقوم بتحويل الخط فأخبرني الموظف أنهم أوقفوا خدمة تحويل الخطوط بسبب المشاكل !!
يعني لو قمت بالإتصال الدولي وفتح الخط لمدة يوم كامل ستخرج الفاتورة بمبلغ 400 د.ك وبالتالي لن أدفعها وسيمنع صاحب الرقم من السفر ويجبر على سدادها ؟
أعتقد أن من أبسط حقوقي كعميل أن أقوم بتحويل رقمي كيفما أريد ولأني عندما أريد إضافة أي خدمة أو الغاؤها لن أضطر للاتصال على من سجل الرقم باسمه في كل مره ليذهب معي لفرعهم ؟
الى متى يا فيفا سوء خدمة العملاء مع أن الكل يترقب فتح باب التحويل بين الشركات ليحظى بالتحويل لديكم والهروب من شركة زين ؟
.
السلام عليكم…
كما يعرف الجميع انا فيفا تابعة لstcالسعودية ومن المعروف ان اكبر حراميه هم اس تس سي واللي يسوينه بك هالحين هو مجرد تمهيد لسراقات ستكون في المستقبل.
وشكرا:)
والله يابوابراهيم بالنسبة لـ STC ما ادري عنها لكن أشوف الأغلب أيضا يشتكي منها من الشباب السعوديين
اتمنى أن لاتكون فيفا في الكويت تتبع نفس السياسة في السعودية
والله يا بو فلان .. فيفا افضل الاسوء …
اما موضوع تحويل الخط بأسم شخص ثاني هذا من ردا الادارة
شنو هلسياسه
شنو المشاكل الي تخلي الواحد مايقدر يحول خط من اسم الي اسم
باجر يقولونلنا مايصير تلغي خطك ههههههههه
وبالمناسبة فيفا تفتقر واجد شغلات بخدمة العملاء . المعلومات الي يعطيكياها الموظف غير دقيقة .. يعني لو تبي شكثر اتصلت او شكثر عليك فلوس الي اليوم .. الموظف يتأسف منك مايبين عندة الا فاتورة كل شهر
بس ما تزال فيفا هي افضل من ناحية العروض بصراحة
ومن ناحية ان الشركة الوحيدة الي تعطي الانترنت غير محدود
اسف على الاطالة بو فلان .. تحياتي
هي الأفضل لأنها الأحدث ولقلة مشتركيها
عروضهم حلوة لن الناس بتنحاش منها لأن خدمة مابعد البيع فاشلة الى أبعد حد
سالفة النت غير محدود بسبب قلة المشتركين انتظر عليها شوي بتغير سياستها
افا عليك المدونة كلها مثل الدفتر تخط الي تبيه 🙂
كلامك صحيح ابو فلان
انا كان خطي يبدأ بـ5555 وكان بأسم الوالد وكان خط مفوتر
حاولت اني احول لأسمي رفضوا وحاولت اني احوله للتعبئه هم رفضوا
ماعندي مشكله اني اخليه فواتير وبأسم الوالد
لكن المشكله يوم شريت الأيفون ما كان في إعدادات خاصه للإنترنت يعني ما اقدر اعطله إطلاقاً وكان يومياً فاتورتي تزيد +4 دنانير وكنت اكثر شخص على وجه الارض يتناشب مع خدمة العملاء الجاهلين
وكان ردهم لي كالتالي :
1- حط “خرابيط” بالسيتنغ راح يضبط ,, ولا نفع
2- اخوي روح محلات الي بشرق صوب الخياطين ” يضبطونك ” ,, !!!@$@#
3- اخوي انا حولتك على الدعم الفني انطر يدقون عليك ,, وفصلت الخط ولا دقوا علي
4- احد الموظفين صدم حياتي قالي ” ماكو حل إلا نقطع عنك الـsms و mms و gps ” قلت افصله احسن لي
5- الصدمه الأكبر بعد ما شرحت للموظف معاناتي قالي ” يااااااخي بيع الأيفون ”
وقررت افصل الخط ودفعت كامل الفاتوره كانت حوالي 30 دينار والتلفون بأسم الوالد ولازم يحضر شخصياً ورحنا لهم قالو نفصل الصفر الدولي يحتاج اسبوع
وفصلنا الصفر الدولي ونطرنا اسبوع ورحنا لهم ,, يوم صفينا دور طويل وقبلها سألت الموظف اني فصلت الصفر من اسبوع وابي الغي الخط قالي أخذ رقم وانطرني
وبالصدفه صرت عند نفس الموظف ورفض يلغي الخط لان للحين ما انلغى الصفر الدولي صراحه انبطت جبدي وشرشحت الموظف لكن بكلام من تحت الحزام
وطاف 4 ايام ورحت انا والوالد اول ما فتح الفرع علشان اتفضى لهم رقم الإنتظار طلع عند مدير الفرع
وحاول معاي بكل الطرق وطلع لي خرائط تبين خلل الشبكة بمناطق الكويت اذكرها الشبكة تغطي الجهراء بـ37% تغطيه شامله
الحمد لله افتكيت منهم ومرتاح مع الوطنية
هاذي المشكلة انهم كانوا في بداياتهم وانطلاقهم كان تعيس جدا
واعتقد انهم ما اهتموا كثير بمنطقة الجهرا وبعض المناطق
على العكس كانت شبكتهم قوية في المناطق الجنوبية صوب بنيدر والجليعه
الحين اعتقد بدووا يقوون الشبكة
لكن تبقى سالفة تحوي لالخط شيء مؤسف وماله داعي ماني عارف شنو المشكلة بالضبط
عشان تعرفون معاناة الشعب السعودي مع الـSTC 🙂
حنا معاكم قلبا وقالبا 🙂
اي والله مشكله بصراحة
الله يعينك
دقيت عليهم ذاك اليوم مسكينه الموظفة سمعت مني كلام سم جان تحولني ع المدير ونفس الكلام وصله
حسبي الله عليهم
والله صدقت يابوفلان
الشركة من أول ما افتحوا وخدماتهم بالتلفون خايسه وتلوع جبدك وينقعونك عشان تستفسر عن شي واحد
للأسف من اهم مايجذب الناس للشركات هي الخدمة الممتازه الميسرة الي تخليك لما تواجهك مشكله ماتتردد تدق عليهم
الصراحه فيفا اذا بغيت ادق عليهم لازم افرغ نفسي خخخخخ يعني من ضمن الجدول اليومي يتم ارفاق مكالمة لشركة فيفا
هههه يقطع ابليسك يابوعلي
عيل لازم تفغ نفسم والله ماتنلام ينقعونك بالتلفون ودعاياتهم تييب الهم والغم
قلنا لك خلك وطني 😛
المشكلة الرقم كشخه 🙂
غريبه؟ شنو سالفة الرقم المدني اللي طالعين فيها فيفا! واذا واحد “بدون” متصل عليهم؟ هههه يعطيهم رقم فنيلته!
اخوي ابوفلان ريح بالك ودش موقعهمhttp://www.viva.com.kw/ تقدر تعرف كلفة استخداماتك المختلفه عندهم من كلام و sms و mms وغيرة ..
واذا مجبور تكلمهم اتصل عليهم وخلهم يحولونك على اي موظف بخدمه العملاء بشرط يكون مصري! المصاروه شطار .. وانا جربتهم بخدمة العملاء بفيفا..
اي والله يالمدوّن
الرقم المدني ومره واحد قالي ابي الرقم المدني والرقم السري واسمك الثلاثي قلتله ماتبي صورة من شهادة الميلاد !
لو معامله مايطلبون منك شي بس عشان تشترك وتدفع فلوس بعدين تاكلها معاهم
انا كنت ابي كمية استخدامي للنت ما اعتقد موجودة بالموقع
كلهم نفس الطقة من المصري لي الكويتي
نسيت اقول ان المعلومات بالسايت لا تحدث اول بأول
بل تنطر ايام طويله بعدين يحدثون المعلومات بالسايت وهذا شيء ما احبه
اسمحلي بوفلان
شركة فاشلة
انا جربتها اول ما بطلت
ورحت قطيت الخط عليهم وقلت سكروه مابيه
انطلاقتهم فعلا كانت فاشلة واستعجلوا فيها كثير للأسف
صار الموضوع بس بيع بيع بيع وبعدين نزل فواتير وجمع فلوس
عشان جذي سمعتهم كانت بطيخ بس الي ساتانسوا الناس الي خذت النت أول مانزل
أما غيرهم كسروا خطوطهم
كلٍ في قلبه غصة، بس أتصور إن Viva أسوء شركات الإتصالات من ناحية خدمة العملاء.
اي والله فعلا الأسوء من خلال تجربتي مع زين
وفيفا
الآن اعتقد ان الوطنية هي الافضل مع اني ماجربتها بس اشوف الكل يمدح فيها
أبو أبراهيم أنا معك قلباً و قالباً …. هذي الشركه يا أبو فلان لعبة على 5 ملايين مشترك سعودي… و طلعت فواتيرنا بعشرات الآف … و صارت سالفه عندنا و لخبطة فواتير .. عاد أنسحب عدد كبير من المشتركين … و لا عاد أحد يثق فيها حتى ما عندهم بيانات أستهلاك للمشترك في الخدمه و إذا قلت لهم أبي فاتوره حاولوا يتهربون من الجواب … صاروا عاد عندنا يسمونها … STC = Steals The Customer
أبعد عن الشر و غني له يا أبو فلان ما أقدر أقول إلا كذا… 🙂 الي هذا أوله ينعاف تاليه.
النت تعبان مالهم
وكل الشركات الكويتيه بالنت تعبان وحراميه كلهم
مال نرد مثل اول
اللي يبيني يدق على البقاله لووووووووووووووووول
شركة فاشله ولا تصلح لخدمة عملاء مشكلتي مع الشركة في تحويل خطي من شركة الوطنيه الى فيفا الى اشتراك الباقات وعدم التزامي في العقود وسلت الموظف في بعد شهر من تجربي في الباقات الى تعبئه الرصيد قال نعم في اي وقت وعندي تحويل الى تعبئه قبل الساعه ١٢ وعدم وجود موظف الفرع واتصلت في ١٠٢ وقال روح فرع ثاني وعند ماحادثت الدعم المباشر قام موظف اسم عبدالرحمن اغلاق الماحدثه في وجهي ٩ مرات وعدم ابلاغي عن اي مشكله او معلومه وعند اتصالي في ١٠٢ وتقديم شكوى من تاريخ ٢٢ / ٢ الى ٣/٤ والى اليوم مافي رد او اعتذرا او حل في المشكله من الوظف او تحويل خطي او حل المشكله