مطعم روبي تيوز داي أو " ruby tuesday "

امممممممممم شقول شحجي ..

المطعم أمريكي يقدم الستيكات والمأكولات البحرية بالإضافه الى أطباق الدياي والباستا ..

موجود بالكويت عندنا في الأفنيوز ويم الأكوابارك وبمنطقة المهبوله هاذي الثلاث اماكن الي رحلته فيها <<< يعني ترا أكثر من مره رحتله

أفضل وقت للذهاب :

* بالنسبة لي راح أتكلم عن فرع المهبوله الي هو أكثر واحد أروحله الزحمه تكون من بعد الساعه 7 الى 9 يكونون الأجانب واااايد خاصة وأن المنطقه هناك متروسه أجانب وأجنبيات الاحياء منهم والاموات ..

المــكان :

* افضل فرع فيهم من حيث المكان والأوسع هو الي بجانب الاكوابارك وأصغرهم الي بالمهبوله ..

*لكن طاولاتهم راهيه والمكان في المهبوله هادئ لولا الأغاني الي تقث خاصة اذا كانوا داشين جو وزايدينها حبتين ..

جــودة الأكــــل :

* بصراحه انا أكثر شي أطلبه بحري وراح أحطلكم صور افضل الأكلات الي تطلبونها اذا زرتوه .. لكن بشكل عام الاكل ممتاوز جدا وطعمه خيالي بدون مبالغه

ما ذقت الى الآن أحلى من مقبلاته او بعبارة اخرى عنده أشياء تميًّز فيها عن غيره بعيدا عن التقليد << ترا متعوب عليها هالعبارة

وكمية الأكل ممتازه يعني يمكن طبقين من المقبلات يخليك تشبع ..

السعــر :

* مناسب جدا أرخص من أبل بيز وشيليز ووسابي <<< اما وسابي بكتب عنه تدوينه بطلع حرة الفلوس الي دفعتها فيه ..

* يعني تقريبا الثلاث أشخاص يطلع حسابهم 25 اذا ابطروا بالطلب وزادوها حبتين ..

الخدمــــه :

* راقيه يعني نفسيتهم مو خايسه نفس بعض المطاعم خاصة اذا الي يشتغلون من جنسية معروفه بالنفسية الي ودك تحذفه بالشوكه اذا شفته بس بعدين ماتقدر تاكل ههههههه <<< املق املق

المطعم باختصار أدمنته انا والشباب ومن حسن حظي انه المدام ماحبته ,, ليش من حسن حظي ؟؟؟

لأنك اذا رحت مع الشباب محد راح يحلف ويقول الحساب علي الا اذا واحد ابوه توفى وياله ورث !!

واذا رحت مع المدام لازم الشنب هو الي يدفع وانت ريال البيت وعيب تخلي مرتك تدفع ,, طبعا لأنني أروحله وايد فصار هالشي من صالحي

ولا المطاعم الثانيه لازم نودي وندفع مو عيب والبخل عموما غير ممدوح <<< ممدوح هذا مدرس مصري معانا ماسك المقصف من يوم انا بأولى ثانوي الى ان تخرجت من الجامعه ورجعت مدرس بنفس المكان وهو لي الحين ماسكه

الحين انيي حق أفضل الأطباق الي تطلبونها اذا رحتو المطعم :

المقبلات :

1– هذا الطبق إسمه ” تايفون شرمب ” شرمب يعني روبيان حق الي مايعرف انجليزي ( وهو احلى والذ طبق بالنسبة لي )

2– الصورة الثانيه فيها طبقين :

الأول الي ع اليسار يسمونه ” كراب كيك : يعني كيكة القبقب ” بصراحه لذيذه جدا

والثاني الي ع اليمين اسمه ” تايفون تندرز ” وهو عبارة عن أصابع دجاج مقلية مع الصلصة “

وهذا نفس طبق الدياي صورة ثانيه :

الحين انيي للأطباق الرئيسية :

بالنسبة لي ذقت الستيك في محلهم الي عند الاكوابارك ماعجبني لا انا ولا صاحبي بس في نقطة نظام ,, إما احنا ما احسننا اختيار نوع الستيك مثل ما انتوا عارفين فيه انواع كثيرة للستيك ويختلفون من حيث الحجم والطعم والطراوة والتتبيله ..

أو انه صج كان مو شي

بس آخر مره رحنا صاحبي طلب ستيك ريب آي كان طعمه ممتاز .. وهاذي صورة الستيك

وصورة أخرى

الطبق الاخير الي دائما أطلبه كطبق رئيس إسمه ” لويزيان شرمب “

وهو عبارة روبيان مقلي بالبقسطات لذيذ جدا جدا ..

وهذه صورته الله يرزقنا الحين بواحد لأني مو متعشي

بصراحه بعد هالأكل يبيلك شي تحلي فيه

ياسلام على هالكيكه صج لي قالو فتنه ..

أتمنى يعجبكم هالتقرير وترقبوا المزيد ففي الكرشه الكثير أقصد في الجعبه الكثير ..