مدونة أبوفلان تقنية ، أخبار ، تجارب شخصية ، مطاعم ، سياحة
قبل شهر تقريبا كنت أعاني من صوت في مكينة سيارتي اليوكن
في البداية تم تطنيش الصوت لمدة شهر لكن بعدها بدأ الموضوع يتطور الى عدم التمكن من تشغيل السياره الا بعد سبع محاولات تشغيل
فقررت الذهاب لفحصها في وكالة الغانم الذي اخبرني الموظف فيها أن الصوت من داخل المكينة وقد يكلف من 250 د.ك الى 900 د.ك
وأني أمام أمرين : تبديل طرمبة الزيت فقط والتي ستكلف 250 د.ك وتجربة السيارة وفحص الصوت
فاذا استمر الصوت ننتقل للأمر الثاني وهو أنه يجب فتح المكينة وتبديل عدة اشياء منها الكام والتكايات وامور أخرى
طبعا النصيحة من هذا الباش مهندس انتهت بقوله ” خل السياره على ماهي عليه افضل لاتصلحها ” !!
وهذ الفيديو يوضح الصوت في المكينة
httpv://www.youtube.com/watch?v=RNVKmZ1Q7tU
بعد الاستفسار وجدت كراج Auto1 في الشويخ الصناعية وأن شغله مثل الوكالات
وبالفعل توجهت للكراج وفحص السيارة و ردد علي نفس كلام الوكالة لكنه نصحني بتبديل طرمبة الزيت أولا وتجربتها حتى لا يكبر العطل وتضطر لتبديل قطع أخرى
ونصحني بقطع للسيارة من الشركة الأهلية وهي المعروفة بالقطع التجارية للسيارات لكن الأمريكي ماتفرق معاه اصلي ولا تجاري 🙂
المهم أن التصليح كلفني بالتمام والكمال 170 دينار ، الأغراض 70 د،ك وشغل الكراج 100 د.ك
الكراج تعاملهم راقي وكل شيء بالفواتير ولايقوم بتبديل اي قطعة الا بالاتصال عليك والتأكد
نصيحتي لا تأخذ بنصيحة الوكالة في كل شيء فالموظف في الوكالة الذي نصحني على فرض أنها نصيحه فعلا !! بعدم تصليحها لم يكن على صواب
بالإضافة الى عدم اهمال السياره لتتفاقم المشكلة فلو لم اقم بتصلحيها بعد شهر تقريبا لأثر ذلك على المكينة وكان تصليحها أقل شيء 800 د،ك
بو فلان انا عندي سوبارو والسياره على ايدي من الوكاله
استمريت معاهم بالسيرفس الين ٩٠ الف وبعدها قامت تهرب زيت –صرفية– الزيت يروح داخل المكينه وتطلع دخان
يوم رحت عندهم قلت لهم المشكلة قالولي لازم نبطل المكينه والسعر ٥٠٠ دينار مبدأي ممكن يكون اقل وممكن ارخص وبعد الفحص اتضح المشكلة ان ربل صباب والتبديل يكلف ٣٩٠ دينار
مع اني منتظم بالسيرفس الا انهم صعقوني بخبر ان الكفاله انتهت من ٦٠ الف ! قلت لهم طيب انا مستمر معاكم بالسيرفس حتى اللمبة عندكم تتبدل ! قالوا مالنا شغل !
بعد فتره حاولت اعرف سبب الخراب اتضح الزيت اللي يعبونه نسبته ما تلائم المكينه حسب كلام الكاتالوج ! يعني الغلط منهم ! شوف شلون استمريت معاهم ودفعت مبالغ كبيرة آخر شي طلعوا يركبون لي زيت غير المنصوح فيه من المصنع !
هذا وهي وكالة حسبي الله ونعم الوكيل !
المشكلة هنا لا تعلم هل هي من الموظف او من تعليمات الوكالة
مشكلة زيادة الدهن مضره بالفعل او نوعية الزيت ايضا تسبب مشاكل
معوض خيير
وأنا غالبا ما اكتفي بزيارة كراج واحد حتى لوكانت الوكالة
يهب ياوجهه يقولك لاتصلحها
ودي اروحله اقوله بدلت مكينة ابشرك بسبب نصيحتك الي مثل ويهك
هالخبل اشلون يقولك لاتصلحها ؟؟
اوتو ون اظن عندهم واحد اسمه عزام المدير كان يشتغل بوكالة من الوكالات ناسيها
شغلهم نظيف بس غالي
اي والله يابومحمد يقولي اذا بتصلحلها بتكلفك خلها لين تضرب المكينة بعدين بدلها !!!
نعم عزام اظن قالي كان يشتغل في الغانم
وانا حاط عيني على الاوريون :))
بس ناطر ينزل كادركم وترميها وتشتري الـ لكزس 460
اللي حطيت صورتها قبل كم يوم !!!
لا الظاهر تم الغاء الفكرة واستبدالها بالبحث عن منزل 🙂
اخوي ابو فلان للمعلومية هالصوت يتزامن معاه تغيير في الساعه الخاصه بالزيت الموجوده في العدادات وتجدها بجانب الحرارة والبنزين
عادة يكون العداد في المنتصف ويزيد بازدياد دوران المكينة
لكن في حالة الخلل تجده منخفض ومايزيد مع الدوران
يعني انتبهو ياشباب
وهالصوت يكون ناتج من طقطقه البلوف وعدم وصول الزيت لها بشكل مناسب بسبب ضعف في اداء الطرمبة حقت الزيت وهالشي دارج في كل المديلات هذي
لكن المديلات الجديده ماصارت تخرب لكن فيه هوزات صغيره تتشقق وتهرب الزيت الى داخل المكينة ويضعف ضغط الزيت وتسبب نفس الصوت
يعني انتبهو لايلعبون عليكم 🙂
وشكرا
بالضبط وللاسف اول ما تعطلت هالساعه رحت للوكاله قالي يمكن الابره خربانه من الطبلون 🙂
بالفعل كان صوت التكايات هو المزعج بسبب عدم وصول الزيت للكام والتكايات
شاكرلك المعلومه بالنسبة للسيارات الجديدة هذي الأهواز تتبدل بسهوله ولا صعبه ؟
الاهواز اخوي ابو فلان تربط بين الطرمبة حقت الزيت والمجاري اللي توصل للداخل المكينة وتحتاج فك غطاء الكرتيل من اسفر المكينة
لكن الميكانيكيين يقول لك خير الطرمبة وهي اصلا الاهواز وسعرها مايتعدى 70 ريال اي مايقارب 5 دنانير
وشكرا لك ايضا حبيبنا ..
بيركب طرمبه زيت سياره ولا راس مفاعل نووي … بميه دينار
جان يبتها لي انا اسويها لك
ههه والله قلت ابي شي مضمون لانه كان لازم يفحص المكينة هل هي تأثرت أو لا
في الصناعية ارخص لكنني ما اضمن انه يكشف كشف كامل على السياره
انا عندي فورد اكسبلورر سويت فيها حادث بسيط قلت خلني اروح الوكالة دام انه بسيط رحت وقالوا خلها اسبوع ونعطيك تقرير وبعد الاسبوع دق علي الموظف وقالي راح تكلف ٣٥٠٠ دينار كويتي ، قلتله ليش قال احنا ما نصلح كله تبديل اخذت السيارة وسويتها في جراج بره كلفتني ٧٠٠ دينار ووفرت الباقي ، ما ادري وين اصحاب التوكيلات عن اللي يصير اشلون توكيل ما يصلح وكله تبديل
طرمبة الزيت مشكلة قديمة في الجي ام سي والشيفر واذكر كانوا يستبدلونها بطرمبة الزيت من لكزس عاد كيف تركب الله اعلم
المعذرة اخوي
المشكلة اللي تقصدها مو تخص طرمبة الزيت
هاذي تخص طرمبة البنزين وهي اللي اغلب الناس صارت تغير حقت لاندكروزر لانها ارخص بكثيييير
انا بالنسبه لي غيرت حقت لاند وجلست معاي سنة وردت اخربت
رحت وغيرت اصليه والآن مستمره الحمد لله لها فوق 3 سنوات مع العلم انهم قالو لي ترا بتخرب لكت تسهيل من رب العالمين بارك لنا فيها
خالي عنده سوبر بعد ونفس الشي خربت عليه وغيرها بحقت لاند والآن ماشيه معاه ولا اشتكى منها
حضوض.. لكن فعلا فرق حوالي 5 اضعاف بالسعر
ايضا نسيت لا ابين لك شغله مهمة
الا وهي بداية الاعراض تلقى السيارة تطفى من حالها وانت تمشي وتشغلها وتشتغل وقد تستمر وقد لا
لكن احذر تراهي فعلا تغدر فيك وقد تخرب بدون سابق انذار
ابو فلان اخذ تويوتا
وطف مخك من عوار الصناعيه والخرابات
كان عندي يوكن وربي لو مخذ مرسيدس ابرك
كل شهر خرابات وانا احترم الموتر بس طلع مو كفوو
الي مؤيد لي يسوي لايك
اخذ هذي بو فلان انا سيارتي قبل لينكولين ال اس
وقفها المصنع سنة 2006 والي عندي موديل 2001
قامت ترتفع الحراره و المكيف صار حار رحت الوكاله قالولي 1600
800 قطع و 800 شغل يد لما استفسرت عن القطع بروحها طلعت قيمتها عندهم 400 سألتهم قالوا لا احنا نبدل القطعه و كل الي مرتبط فيها ، المهم بدلت الكمبريسر بواحد مستعمل بالشويخ و شيشت الراديتر و طلع علي 75 فقط لا غير !!
السلام عليكم انا مكانيكي كراجنا بلجليب والله على ماقول شهيد ان الشهر اماضي مسوي 5 او 6 طرمبات مع العلم انه الا سياره وحده بدلت طرمبه والباقي كله تصليح وكل سياره اخذت عليها 90 دينار بلا وكاله بلا مهندس وما يلزم تبديل كام ولا تكايات ام ان الامر بسيط وتكلفه 90 دينار مع كفاله شهر ام هو انشاالله ياخذ سنتين واكثر انشاالله جليب الشيوخ شارع المخفر كراج انوار