مطعم فات برغر .. FatBurger

,

من الإسم يتبين لك أخي الكريم أنه يبيع همبرغر 🙂 << تصريح صحفي مو ريفيو

المطعم توه فاتح فرعه بمجمع spoons في المهبولة

طلبنا السنغل برجر وعنده الدبل وعنده التربل غير همبرغر الدياي

هاذي البرغر كان طعمها ممتاز لكن بالنسبة لي وللربع إن مطعم جوني روكتس أحلى منه طبعا مع الفرق في السعر عند شراء البرغر فقط

.

,

الشبس يوجد نوعين skinny  و  fat

طلبنا اثنين بطاط ضعيف وواحد متين لكن يابو الطلب كله بطاط ضعيف

البطاط كان يابس وعادي جدا

.

.

حلقات البصل كانت عادية جدا مافيها شي مميز ذكرتني بحلقات بصل هارديز  <<< هارديز ماعنده حلقات بصل يا جذاب 🙂

.

.

طيب عاد اتكلم الحين عن الميلك شيك

أول مره أشوف ميلك شيك ماينشرب صاحبي عبدالله بلع ضروسه من كثر مايشفط وماطلع شي معاه 🙂 وآخر شي قام أخذله بيبسي

كان فعلا كأنه آيسكريم بس ذايب شوي أيضا كان حالي جدا

.

.

في شغله بتكلم فيها قبل لا أيي للتقييم

المكان كان زحمه الطاولات كلها فل واضطرينا ناخذ طلبنا سفري في البداية بس اول ما خلص شفنا طاولة فضت وقعدنا

بس الغريب إنه في شخصين قاعدين وماخذين طاولتين حق أربع أشخاص مع لابتوباتهم ومبين إنهم تابعين للمطعم والناس مو لاقيه مكان

لكن ماصورتهم الا لما بغينا نطلع من المطعم عشان جذي تشوفون الطاولات الي وراهم فاضية

يا أخي شوفلك مكان ثاني انت توك فاتح المطعم اقعد بره مثلا أو دبرلك مكان ثاني مو قاعد وماخذ مكان غيرك وتخلص شغلك والناس مو لاقية مكان !!

.

.

التقــــــــييم

الخدمة 7 / 10

طلبنا كتشب طنشونا

والرقم الي يعطونك اياه عند الكاشير عطتنا اياه غلط الرقم 30 ورقم الفاتورة 29

المكان 7 / 10

جودة الأكل 6 / 10

الأسعار 6 / 10

الصراحه أسعاره غالية بالنسبة لأكله

البرغر بروحها بـ 1.650 هذا عادي بس اذا تبي وجبه سعرها 3.650 🙁

طلبنا 3 وجبات سنغل برغر وميلك شيك الحساب طلع 12 د.ك

.

20 تعليق

  1. عليك بالعافية 🙂

    يا ان ناطرين احد
    او يبون يصيدون القز فحاجزين مكان
    🙂

  2. أنا الخدمة أعطيها 6 ، وجودة الأكل اعطيه 7 .. ونسيت تقول حركتهم السخيفة لما تطلب كلهم يصارخون تحس تحية العلم بطابور الصباح !
    أنصح الواحد يطلب سفري وايد أحسن من الطاولة ..

  3. شي حلو
    دائما تتحفنا بالريفيو الطيب للمطاعم

  4. مشكور على الرفيو 🙂

    شكلي بجربه بعد سنة

  5. مشكور على الريفيو ، وبالعافية .. أسعارة غالية و خصوصا الوجبة إشدعوة بيبسي و بطاط بدينارين! أو السعر شامل الميلك شيك؟

    • الله يعافيك ويسلمك 🙂

      سعر البرغر بروحها ١.٦٥٠ بدون اضافة الجبن
      اذا تبيها وجبه ٣.٦٥٠ 🙁

      سعر الميلك شيك بروح
      البرغر حلو وترف بس ولا شي عند جوني روكتس

  6. ماعمري جربت همبرغر حلو بهالمطاعم وجبات ماكدونالدز الذ..

    لي فتحوا فرع 2 قريب او صارت لي روحه هناك بجربه ان شاءالله..

    بالعافيه يارب..

    • والله الهمبرغر للأمانه طعمها حلو لو تقارنينها مع ماكدونالدز تحسين انج قاعد تاكلين قطعة تاير 🙂

      جربي جوتي روكتس راح تنسين الماك رويال والتيستي 🙂

      الله يعافيج

  7. شكل الهامبرغر لذيذ ..

    بس حلقات البصل .. شفيها جذي نص البصل بره أقرع ..

    وبعدين منو مسعبل على الطاولة عند الميلك شيك 🙂

    عوااااااافي

    • لا عجيبه وطريه بعد

      حلقات البصل تسويلك اغراء عشان تاكلها 🙂

      هذا واحد من الربع بيشوف الطاوله ثابته جان يرفسها بكرشته والسفن كله انصب 🙂

      الله يعافيك

  8. وايد ناس يمدحونه 🙂

    اذا فتحوه بالافينيوز او 360 بجربه

    المهبوله بعيده :\

    • انا ذكرت رايي بكل صراحه

      الصراحه ما اثق براي الناس الي معطينهم دعوة لتجربة المطعم 🙂

      اعتقد بيفتحون بس متى الله أعلم

  9. كللش ما شجعتني أروح للمطعم :p
    بالعافية و يعطيك العافية ان شاءالله

  10. ماشاء الله عليك

    بالعافيييييييييييييييية

    دائما تبلغنا بأحدث المطاعم والتقييم

  11. مشكور علي الصور الي وريتنا ياة بس ابي اسأل سؤال وين مكانة بالضبط

  12. السلام عليكم
    بالعكس يالغالي المطعم رائع رائع جدا الهمبورجر شي عجيب وعندي افضل برجر في الكويت وبعده جوني روكتس
    والسيرفس ممتاز
    وبالف عافيه عليكم

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *