مدونة أبوفلان تقنية ، أخبار ، تجارب شخصية ، مطاعم ، سياحة
كما أخبرتكم فقبل العيد بأيام تمكنت من الحصول على راوتر شركة مدى للإنترنت التي تعتمد على تقنية الـ Wimax لتزويد عملائها بالإنترنت
ولتتضح الصورة أكثر عن طريقة هذه التقنية وتوزيعها للإنترنت فهذه الصوره توضح الموضوع أكثر
كما هو واضح في الصورة ، فلكي تحصل على سرعة وقوة للإشتراك عن طريق شركة مدى لابد من الآتي :
* أن تكون التغطية قوية و متوفره لمنطقتك وذلك عن طريق وجود برج قريب من مكان استخدامك للانترنت ، وهذا الشيء يجب أن تتأكد منه قبل اشتراكك مع الشركة ويخبرك الموظف عنه .
* النقطة الثانية وهي مهمة ايضا : وضع جهاز الراوتر في مكان يمكنه التقاط الارسال بأقصى قوة في المنزل .
فمثلا من خلال تجربتي : وضع الراوتر في المكتب كان يعطيني اشارة لبرجين او ثلاث فقط مما يسبب بطئ في الإشتراك ، أما في غرفة النوم فالراوتر كان يحصل على تغطية قوية ويعطيني اشارة لخمس ابراج وهي اقوى اشارة في الجهاز .
صورة توضح ضعف التقاط اشارة البرج في مكتبي
صورة توضح قوة التقاط الراوتر لارسال البرج
* النقطة المهمة الثالثة والأخيرة : عندما تريد معرفة قوة الإشتراك في تحميل الملفات يجب أن تقوم بتجربة التحميل من خلال مواقع التحميل المعروفة والتي تتردد عليها دائما ، لأن قوة التحميل تعتمد على قوة سرعتك وقوة عملية الـ upload من الموقع الذي تريد تحميل الملف منه .
تجربتي بالفيديو !
* فضّلت أن أقوم بتصوير كل شي بالفيديو حتى لا يتهمني البعض بالتلاعب أو بشيء آخر وليكون كل شيء واضح أمامكم
الفيديو الأول يوضح سرعة التصفح عن طريق متصفحي Firefox & Safari ولعدة مواقع مختلفة
httpv://www.youtube.com/watch?v=HrZkE-Q7Uu8
الفيديو الثاني يوضح سرعة تشغيل مقاطع اليوتيوب بعدة جودات 340 , 480 & 1080p
وسرعة تحميل المقاطع من موقع اليوتيوب أيضا
httpv://www.youtube.com/watch?v=cVJKzCgEtP0
الفيديو الثالث يوضح سرعة تحميل الملفات من مواقع مختلفة مثل Rapidshare , MediaFire & Apple.com
httpv://www.youtube.com/watch?v=CDACChEniB4
أمور يجب أن تنتبه لها !
* سعر الإشتراك الشهري 20 د.ك ، وبدون قيود على التحميل ، وسعر جهاز الراوتر 40 د.ك .
* الشركة تعطيك مدة أسبوع لتجربة الإشتراك يحق لك فيها ارجاع الجهاز و أخذ المبلغ الذي دفعته .
* اذا كانت التغطية ضعيفة في منطقتك لا تشترك بالخدمة ثم تقوم بذمها .
* اختيار مكان مناسب في البيت لجهاز الراوتر .
الإيجابيات !
* الإشتراك يوفر للبعض سرعة أعلى من سرعة الـ DSL في بعض المناطق التي لاتدعم خطوط الهاتف فيها أكثر من 512 أو 2 ميغا .
* امكانية التنقل بالجهاز والإشتراك بما أنه يعتمد على الأبراج ولايعتمد على خط البيت .
* يمكنك الحصول على خط للمنزل من خلال الجهاز يبدأ برقم 229xxxxxx توفره الشركه بنفس رسوم وزارة المواصلات .
السلبيات !
* سرعة التحميل غير ثابتة تتراوح مابين 400 الى 900 .
* تغطية الراوتر ليست قوية بما فيه الكفاية فالجهاز بيتي وبينه ثلاث غرف لم أستطع الاتصال بالشبكة من خلال جهازي الآي ماك .
* تأثّر تقنية الـ Wimax بالأحوال الجوية .
* أحيانا قليلة جدا يفصل النت وتضطر لاطفاء الراوتر وتشغيله .
هل تنصح بالإشتراك ؟
* نعم أنصح فيه لمن يعتمد على اشتراك شركات الإتصالات في المنزل والدوام في حال كانت التغطية عنده ممتازة ، أو لمن لايملك سرعة عالية من خلال الـ DSL
* ويمكنك ايضا الإستغناء عن اشتراك الـ DSL في حال كنت تعاني من السرعة والمشاكل كما أعاني أنا الآن مع كواليتي نت .
موقع الشركة : mada.com.kw
ت : 1801888
تويتر : Mada_Kuwait@
كويس ..
طيب عطنا سرعة النت من موقع سبيد تست :
http://www.speedtest.net/
تم اضافة صورة للموضوع أشكرك للتذكير
لكن الانتباه لازم تكون التغطية ممتازة مثل الي عندي التغطية جدا ممتازة
المشكلة أني مرتبط مع شركة فيفا بعقد سنتين الذي يقول شعارهم ( مع فيفا تقدر ) وانا اقول ( مع فيفا ما تقدر .. تحمل نفس الاوادم) !! الكل شال الكابح الا هالحيتان ما ادري متى بيشيلونه؟
عموما انا ما اشتكي من سرعة فيفا عندي ، لكن اذا انتهى عقدي معاهم راح أوقفه واشترك مع مدى لأن السرعة متشابهة + راوتر + نفس السعر اذا مو ارخص! + مافيه كابح 2 جيجا نفس فيفا .. طبعا هذا في حال بعد انتهاء عقدي كانت شركة مدى مستمرة في نفس الجودة التي هي عليها الان اللي الكل مدحها لي ..
شكرا لك بو فلان على التقرير الجميل والمفصل 🙂
الله يعيني ويعينك شركه تعبانه وعانيت منها لين إتخذت القرار ودفعت شرط العقد ,, الراوتر مداه ضعيف والداونلود يعطيني بس 7kb؟؟ مع إنه إشتراكي 7.2mb
ماأنصح فيها نهائياوإلى الأن ساسة الكبح موجوده
مشكور بو فلان على هالريفيو كنت ناطره .. ^_^
بو افنان عفوا على الحشريه على قولتهم .. بس ترا العقد ما يربطك
لانه ببساطه الخدمه ما توصل حتى بالحد الادنى منها .. فتقدر تفسخ
العقد ولا تدفع رسوم ولا قالها الله >>> هذا مع كل الشركات و على تجربتي
حاليا اشتراكي فيفا بشوف مدى اذا زين حولنا اذا مو زين خلنا على مجنوننا هههه
لا فيه رسوم الغاء للعقد حسب ما اذكر ، لكن راح اتأكد من هالشي اذا فعلا مافيه بشترك بمدى ان شا الله.
صحيح رسوم الغاء بس منو قال انت بتلغي ؟؟ انت تطلب فسخ العقد لانه الخدمه مو واصلتك
يبيلها اسبوع مجابل تدق عليهم و تسال اقل سرعه ممكن توصلني و قارنها بلي يوصلك و راح يلفون و يدورون و اخرتها يقولون لك ممكن نفسخ العقد و تروح تسلم لهم جهازهم و بعد ١٠ ايام عمل اظن تردلك فلوسك .. و موفق خيو ^_^
يا جماعه شركه فاشله جربت الراوتر في كذا منطقه ما يساعد
اشتراك وخدمه فاشله
ال viva احسن وطيااااره
والصوره التيست اللي حاطها الاخ ديكور فقط لا غير
!!!!
عفوا بورسلي انت ماتستحي ؟
يعني تبي تجذب الريال صاحب الموضوع ؟
انا واحد من الناس اشتركت بشركة مدى وجربته بعدة مناطق من احسن مايمكن ومافي مشاكل لان الشركة تقول حق العميل انت وين ساكن عشان يقولون لك اذا المنطقه فيها تغطيه او لا
ونفس ماقال صاحب الموضوع وانا متأكد من كلامه عدل وشكرا
بورسلي صاج وانا نفسك خذو فلوسي 240 دينار وهوه خرطي عملت جميع المحاولات التي عملتها وما كو فايده خرطي
بعد تجربتي للشركة انصح بها و بشدة
الله لا يغير علينا 🙂
تنبيه للأخوان الGamers تقنية ال WiMax ما انصحكم فيها لأن معروف البنچ راح يصعد وياك داخل الكويت من 50-120 ويمكن اكثر فمابالك بسيرفرات آوروبيه او امريكيه.. راح يوصل عندكم 500-1000
البنچ الطبيعي داخل الكويت في ألاشتراكات الارضيه ( DSL ) يتراوح مابين 5-20
البنچ من الكويت لي اوروبا 95-200 طبيعي
البنچ من الكويت لي أمريكا 250-400 طبيعي
قواك الله بوفلان
واتمنى لهذي الشركة التطور إلى الأفضل للفائدة لنا كمستخدمين
تحياتي
اتمنى من الشركة انها تطور..
انا مشترك معاهم من شهر ونص تقريبا الداون لود عندي تقريبا 3 ميجا
يعيب الشركة قطع الصيانه طوال شهر رمضان بشكل يومي
وعدم الرد على الرقم الساخن
اتمنى تفادي هالسلبيات وبالتوفيق
هذه السنه الثالثة لي مع كيمز
و بصراحة مو حافظ رقمهم لاني ما احتاجه
عكس كوالتي لمن كنت مشترك عندهم كنت حافظ الرقم صممممممم
اقصد رقم الكول سنتر
+1 كيمز ممتازه
يعطيك العافيه بو فلان والله شكلي بشترك معاهم
وتقرير ممتاز
جذابييييين نصابيييين حراااااميه … احنا ساكنين بمشرف ق٦ و قالوا لنا من اقوى المناطق بالكويت، اسبوعين بس و بعدين الانترنت يقطع علينا كل شوي و يفصل و الرعه اقل من ١! قالوا اقل شي راح نحصله ٢ ميغا، و اللي قاعدين نحصله بس ١ ميغا اسرع شي!
انشالله يا رب يخسرون و يسكرون! و لا يحترمون الزبون و ماينصبون عليه! و على فكره مهندسينهم اغبيه كله مو عارفين شتو المشكله عندهم! باجي شهر و يخلص الاشتراك و نفتك منهم و من العباله.
مشكور اخوي ابو فلان صراحه نطمح للافضل اخواننا بالسعوديه سرعات تتراوح من ٢٥ ميغا الى ٢٠٠ ميغا
وين العدل بالسرعات ياخي سالفه الكاب كله عشان ماتفكر للافضل واسعارهم تبدا من ٢٩٩ ريال لسرعه ٢٥ ميغا اين مادري هل لنا الحق نمدح شركات فاشله ولاتستطيع مواكبت التطور كله من فلوسك وفلوس الشعب محاوله لنهب اكثر
السلام عليكم,
بالنسبة لهذه النقطة لألتهم و ليلحين ما نزلو الخدمة, فقط للعلم:
* يمكنك الحصول على خط للمنزل من خلال الجهاز يبدأ برقم 229xxxxxx توفره الشركه بنفس رسوم وزارة المواصلات .
بالتوفيق و الله يعطيك العافية على المراجعة لهم
انا اشتركت معاهم قبل شهر، كان تمام يعطيني 1 ميجا بايت داونلود يعني سرعة 9.5 ميجابت تقريبا،
بس صارلة الحين سبوع يعطيني داولون 500 وما يوصل اكثر يعني 5 تقريبا
*ملاحظة* السيرفس نفسه الي ماخذه من البرج ما نزل ولا شي.
اتصلت على خدمة العملاء يقولك طق الراوتر وشغل الراوتر والمهم بالنهاية قالولي انه في احتمال منظقتكم في عليها تطوير، اذا بعد اسبوع نفس المشكلة اتصل فينا.
مع انه كنت احاول اخليهم يعطني رقم تقرير بالمشكله عشان اتابع معاهم مو راضين!
تقييمي لخدمة العملاء سيء للغاية
وشكرا
السلام عليكم
اخواني انا مسوي اشتراك من اول ما فتحتو الشركه وكان النت سريع والحياه سعيده وفي شهر رمضان اخر عشر ايام صارت المشكله وقلتو ييب الجهاز يبته لكم ونفس السالفه بالليل يفصل الى ان تحولت السالفه والسيرفس راح وقدمت اكثر من شكوى وقالو في تطوير للشبكه وقالو اول شهر 11 راح تنحل المشكله ما انحلت ولا صار شي والمشكله اني دفعت لكم تجديد وادري بعد ما راح تتعدل الشبكه ومو بس انا اللي اشتكي الناس كلها تشتكي
وتبي تسالوني انا اي منطقه انا ضاحيه فهد الاحمد قطعه 3 وكان السيرفس اوكي ميه ميه بس خربتو علينه فتحتو شهرين وتبون تعدلون ليش من اول ما عدلتو مو تبيعون على الناس بعدين تقولون نبي نطور بس ترى انتو اللي خسرتو الزباين مو احنه اللي خسرنه
وشكرا
دقيت على الشركه وقالي منطقتك الاشاره فيها 99%
ان شاء الله ها الشهر راح اشترك فيه وأكنسل اشتراك زين الفاااااااااااااااااااااااااااااااااااشل ما ادري شنو سالفته قبل كانت السرعه مو طبيعيه الحين بطيء وفاشل وكل شوي لازم تفصل النت وترد تشبك
حرااااااام قاعد ادفع 32 دينار
أشتركت معاهم عقب ما دزو مسج سكان القصور تمتعو الخ … يوم ركبته بالبيت ما عطاني لا فوق السطح داخل البيت بالحوش مستحيل حتى جربت بالطابق الثاني ماكو !!! بوخالد لا تسفل بزين ترا انا قلت نفس الكلام عند البياع بس يوم جربته انصدمت … كان عذرهم قطعه 7 ما تغطت 100% بس 70% يقولي عطنا جم اسبوع و انغطي القصور فل …. لا والله و يصيرلي نفس الافلام اللي قاعد تصير بالعالم انا اقول لمن تتمكن الشركه ذيج الساعه سوو عروضكم وخلو الناس تمدح مو تذم فيكم :1
مدى من افشل شركات النت فالكويت مدحوا لي فيها كثير واول شهر تمام بعدين سلامتكم كاني مشترك بنت الصومال السالفه نصب في نصب والله فيفا وزين طلعو اقوى منها ابمليون مره
بعد اشتراكي بالخدمة تبين لي ما يلي
تغطيه الراوتر ضعيفه جدا ولاتزيد عن اربع امتار
الجهاز لايعمل داخل المنزل بل على الشبابيك
تغطية المنطقة المعتمده لدى الشركة هو ٥٠ بالئه من مساحتها
بعض المناطق المذكوره بجدول التغطيه من صدوره الي الان لاتزال غير مغطاه
البر الشاليهات المزارع الفراغ بين منطقتين. غير مغطى
التحميل لايزيد عن ٢٥٠ وكل شهر يقل
اذا كنت من مستخدمي الانترنت بالسياره فان الخدمه تنقطع لعدم تغطيه. مابين المنطقتين
من حسنات شركة مدى انها الوحيده التي تعطيك اقرب رقم سرعة متفق عليه بالعقد فهي تبيعك عشره ميجا وتعطيك خمسة ميجا بينما شركة فيفا تبيعك ٤٢ ميجا وتعطيك واحد ونصف
قالت الشركه انها تعتمد علا الاقمار الصناعيه بنما هي اول من تاثر بانقطاع الكيبل البحري
اعجبني سرعة رد موظفي الخدمة
الشركة. ارسلت لي رساله تبشرني بوصول الخدمه لمنطقتي بعد اشتراكي بخمس شهور
اذا شغل اخوك في الغرفه اللاخرى قطعة فيفا او زين او الوطنيه فان كميوترك يلتقط الاشاره منهم بسبب ضعف راوتر مدى بسكت
ابراج الشركه في الكويت صغيره وقليله ويمكن حملها كلها في شاحنه
الانترنت لم يفصل معي. ولكنه ليس بالسرعة المذكوره بالتقرير
افضل انترنت ممكن تحصله في الكويت هو DSL لو اشتركت في ٤ ميغا مثلا لو تنزل السرعه كيلو بايت واحد لك الحق تتصل و تاخذ حقك
اما الباجي مدى على فيفا على زين و الوطنيه كله كلام فاضي ،،، فيفا ٤٢ ميغا و اذا وصلت السرعه عندك ٥ ميغا من الفرحه و دك تسوي حفله !!!! وانته اصلا دافع المبلغ حق ٤٢ ميغا و الباجي نفس الكلام
في الاول سريع و صاروخ و كل ما زاد عدد المشتركين كل ما قلت السرعه . يخلونك تستانس اسبوع اسبوعين و بعدين يمصون دمك
انه ساكن بالجابرية و الخط ما يستحمل اكثر من ١.٥ DSL بس الحمدلله مرتاح السرعه ثابته عندي الحمدلله.
اغلبيه الدول المجاوره الانترنت سريع عندهم ولكن للاسف تبقى دره الخليج دولتنه الكويت الحبيبه طاقه سايد بريك ،، و مثل ما انتوا عارفين انه شوارع منطقة الجابرية مكسره تدرون ليش علشان البنيه التحتيه يعني بايبات كيبلات تلفون …الخ انزين وين الفايبر اوبتيك متى بتشغلونه ؟؟؟؟؟ اكيد لمن تكتشف تقنيه يديده اسرع من الفايبر اوبتيك و بعدين يشغلونها … لاعت جبودنه من هالحراميه عسى يا ربي كل فلس حرام يدش في جيبهم يصرفونه على بلاء رب العالمين و ما يفرحون فيه ابد
يا ترى ماهو انطباعك الان بوفلان؟ بعد مرور فتره
السلام عليكم
تنصحوني اشتررااك شركه مدي الاتصالات
مسوين العرض هلا فبراير اشترااك بسنه 180 دينار تنصحوني اخذاة
او تنصحوني بشركه الثانيه
انا ابي حق العاب انترراانت
انا مشكله انا مسوي اشتراك مع فيفا بطي تبط جبد اشتراكي 21 غيغا
يعني عادي ما تصلح حق العاب
تنصحوني اخذا اي شرركه الانترراانت
تجربتي مع مدى
للاسف اسوأ خدمه ممكن تحصل عليها مع هذه الشركه لقد اشتركت لمدة سنه وللاسف لم استفد من الخدمه اي شئ مع انني ساكن منطقة الجابريه ويدعون بانها من المنطق المغطاه قويه ولكن كله كلام في كلام وخدمة العملاء اسوأ من الخدمه ذاتها لا حياة لمن تنادي فقط كلام في كلام ولن اقوم بتجديد اشتراكي حتى لو وضعت الخدمه مجانا لن اضع خدمة مدى نهائيا
يا شباب تنصحوني اشتراك شركه مدي
: انا ابي حق العاب انترانت كلامت شركه يقول في 10 غيغا : 180هلا فبراير
او تنصحوني شركه غيرة
انا استحدامي حق العاب انترانت
أنا حبيت اشترك بشركة مدى هل تنصحوني اشترك فيها ولا لا مع السبب مع العلم أني راح استعملها عشان العب بلاي ستيشن فهل راح تكون سرعتها زينه
وشكرَ
My download speed on 12/15/13 9:25 PM was 0.54 Mb/s and upload speed was 0.27 Mb/s through the WIFI connection
شركة زفت ونصابين انا اشتركت معاهم وتحسفت النت ضعيف مايوصل ا ميغابايت انا ساكن في الرميثية والاشارة ممتازة بس النت زفت الزفت وكل يوم ادق عالشركة يقولون انتظر نتصل عليك وعلى الطل لمن فقدت الأمل واليوم كذبوا وقالوا تم تقوية الشبكة و حطيت لكم النتيجة. والله على ما أقول شهيد.
بختصار قسما بالله شركة نصب واحتيال يقولون من 2 الى 10 ميجا ومايوصل حتى واحد ونص بس تشترك وتدفع لهم الفلوس خلاص يهملونك للاسف
سلام عليكم , من 2013 و انا مشترك معاهم و من منطقة القصور و الشبكة مغطية بشكل كامل و بعد مشكلة قطع الكيبل في نهاية 2013 و الشبكة من سيء الى اسوأ و لكن لا تنغر اذا وصل اشتراكك 10 ميجا لان هذا فقط في البداية لان بعد مدة الشبكة تضعف و الاشتراك يصير ضعيف جدا . الافضل لاي واحد مشترك معاهم يمرهم الصبح بحولي و يسترجع مبارغه كلها مثل ما سويت انا لان بالعقد منصوص ان اذا كانت المشكلة منهم مبالغك الباقية تسترجع بالكامل و ايضا يفضل انك تعطيهم الراوتر يشوفونه بشبكتهم و تاخذ المبلغ مالك . حاليا يفضل اشتراك زين او فيفا و لكن سيء لمن يحاول استخدام النت للبلي ستيشن و ايضا سيء لكل من يحب الداونلود لان يحدونك على فقط 300 قيقا بالشهر .
للاسف الشركة من اسوا شركات النت كل كلامهم وعود كادبة عند سؤالهم عن التغطية في المنطقة يقول ممتازة وبعد الاشتراك تكتشف المقلب وعند طلب الاسترجاع يماطلون فيك لما تمل وكل يوم سوف نعيد التصال بعد خمس دقائق وتصبح ايام لما تمل منهم يعني جر رجل فقط