مدونة أبوفلان تقنية ، أخبار ، تجارب شخصية ، مطاعم ، سياحة
.
.
هاذي الصورة أرسلها لي أحد قراء المدونة متواجد الآن في دبي
يقول هاذي اللوحة أشوفها بأغلب المطاعم في دبي مما يدل على اهتمام البلدية أو شرطة دبي بعدم تعرض السواح او المواطنين للنصب من قبل المطاعم
ذكرتني هذه اللوحة بقضية المطاعم التي غالبا ما أزورها وأجد في الفاتورة زيادة 10% على الخدمة !
والكثير أخبرني أن هذه الزيادة ممنوعة من حماية المستهلك
شخصيا لم أتأكد منها لكنني جربت مفاجأة مدير مطعم حسني في زيارة للمطعم وقلت له ” ماراح أدفع هالعشرة بتاعت الخدمة لأنها ممنوعة “
وفعلا قال خلاص ماتدفعهاش 🙁
والمصيبة أن اغلب المطاعم المعروفة تضيف سعر الخدمة على الفاتورة
فإذا كانت فعلا ممنوعة هذه الزيادة لماذا النوم ياحماية المستهلك ؟
.
والله يابوفلان انا مثلك
سمعت اكثر من مرة عن هالموضوع
وفي مرة من المرات في احد المطاعم نسيت اي مطعم
قلت ما راح ادفع وهذي ممنوعة وجاني المسؤول
المهم طلعلي ورقة مصورها من جريدة
تصريح لوكيل وزارة التجارة اعتقد
يقول من حق المطاعم والكافيهات اخذ نسبة 10% خدمة
والى الان مادري هل هي قانونية ولا لا!
هي صورة من جريدة .. وقرأتها كان فيها ان وكيل التجارة يقول .. ان هناك (نية) لوضع حد لمن يجلس في المطاعم دون الشراء وسوف يكون هناك رسوم اظافية للخدمة .. لكن القرار رسمي لا يوجد
اها
هذا الظاهر تكررت معاه السالفة وقام قص الخبر وحطه بجيبه 🙂
ماني عارف ليش ياخذون على الخدمة يعني اكيد انا بقعد بتخدمني منو يعني بييب ويودي الاكل انا مثلا !
يجب التأكد منك ومني ومن كل الأخوة والأخوات مع حماية المستهلك
وبعد ذلك نقوم بوضع صورة من القرار إن وجد في مواقعنا لتنبيه الناس عن هذي السالفة العمية في مطاعمنا
رسالةا لاصحاب المدونات ( إنتشروا ) للبحث عن الحقيقة ونشرها للناس 🙂
إن شاء الله انا راح اسأل واجيب الخبر الأكيد
مشكور يا بوفلان على التذكير بهذا الموضوع الإستغلالي …
ابشرك جاك الخبر من الاخ Q8PING لي عندك 🙂
الظاهر مافي قانون يمنعها لكنه يمنع وضع حد ادنى للطلبات
والعفو لأني والله بعض المطاعم ياخذ عليك من 4 الى 5 دنانير وتدري بعد صاحبك مو راعي مطاعم كلش 🙂
الزيادة غير قانونية وحتى سالفة “الحد الأدنى للطلبات” المنتشرة في بعض المطاعم على شارع الخليج غير قانونية أيضا.
والله سمعت من كذا واحد بس الاخ الحبيب كويت بنغ يقول مافي قانون يمنعها
اما الحد الادنى ممنوع
والله مشكلة المواطنين انهم مايعرفون حقوقهم عدل وشنو لهم وشنو عليهم
ولا جان محد تعدى على حقوقه
ساعات ودك تهضم وتحنج اذا الأكل اي كلام
بس انا اذا شفتها موجودة .. حتى الـ50 فلس ما اخليها لو كانوا ماخدين 100 فلس
البعض يحرجك بخدمته وبنفسه الحلوة وماودك تناشبه على هالفلسين
بس البعض خدمته خرطي ويبي فلوس ! هذا الي يقهرك
انا موظف في احد مراكز حماية المستهلك ..
لا يوجد قرار يعطيني الصلاحية بمخالفة مطعم يضيف نسبة بالسعر خصوصا اذا كنت تأكل في المطعم نفسة
لكن هلا الكلام لا يجوز بـ التيك اويه
……………..
اما موضوع الحد الادنى .. او (المينيمام جارج)
فهو بـ قرار 10/1979 … يخالف . لأجبار المستهلك على شراء سلعة مع سلعة اخرى
يعني قالك حبيبي ترا في مينيمام جارج 5 دنانير
قوله خير انشالله
واقعد وخلص وحاسب على قهوتك بـ دينار .. ما يقدر يجبرك تشتري سلعة ثانية ..
بس المشكلة وين في؟؟
تعامل مفتشين التجارة مع هالمواضيع بـ جهل
يعطيك العافيه على التوضيح 🙂
خوش مكان والصراحه سمعتهم طيبة حماية المستهلك مع المواطنين
الله يعطيك العافيه على الإفادة
نغزة قوية … بس كل شي منك حلو
لا والله اتكلم صج
اعرف كثير من الربع راجعوا حماية المستهلك وخذوا حقهم وتعامل الموظفين كان جدا قوي
ماكو نقزات يالحبيب الظاهر الي يوصلكم غير هالكلام 🙂
بصراحه انا كلش مو عاجبني الوضع
النصب عيني عينك يا حرام
انا اعتبره طمع وجشع
اعوذ بالله
حد ادنى للطلبات و10% زيادة على الخدمة
والي يبط جبدي ويقهرني هالخدمه
اقعد بأحد المطاعم المعروفه واطلب بعد سااااااااعه ياله اييبون الطلب
واطر الموضفين اكسكيوزمي ارفع ايدي اسوي كل شئ والله يشوفوني ويطنشون 🙁
مره عصبت وياني بنفسه مدير المطعم كان مصري
فيه ايه يا باشه حاضر متعصبش بس متلك عارف الزحمه والضغط الي بيقينا والبعاته هاه
< اف.اي.آر فرايديز 🙁
شئ يبط الجبد والله ويبيلهم ناس يراقبونهم ويتسلطون عليهم عساس لا يتسلطون على البشر ذبحونا
وسالفة الليميت تغث ساعات تطلب شغلات والله ما تاكلها بس جذي عساس حضراتهم يخلونك تاكل 🙁
بس كل الي علي بدعي الله يطيح سوقهم ولا يوفقهم على فلوس ( الحرام ) ليشنها كلها نصب والله مو منقتهم شئ بس كله من طمع وجشع انفسهم اعوذ بالله
تحياتي على البوست الحلو مثل صاحبة 🙂
شوف مادام فيه عين حمره التعامل بيكون راقي غصب طيب
شوف هي ليست قانونية بس البعض يطلب ماي ويقعد بمكانه مايتحرك يغازل ويخوزز وبس
طبعا الشين المفروض مايخرب على الزين
مطعم نينو مره كان زحمه مو طبيعية والخدمة كانت فوق الممتازة وسريعة وأول بأول
لو في اعلانات قدام المطعم او على الطاولات تقدر تناقش بهالموضوع .. انما لو مثلا تدخل فرايديز يوم الجمعه على العش والناس والزحمه تقدر تفتح حلجك بكلمه وتقولهم .. تعال ليش الخدمه 10% !.. بيحرجونك قدام الكل .. وكل واحد يطالعك بنظره كأنه هو وزير مع انه وده يقول نفس كلامك .. بس شغل النزاكا والماك جكن خلى المواطن يستحي ياخذ حقه … ولا خمس دنانير على شنو .. عشان خدمه ؟ .. يعني اجي المطعم واجيب الخدامه من البيت عشان تطبخلي مثلاً ؟؟ …
ما نقول الا نطالب التثقيف التجاري ووضع لافتات يا بشر ! …
شكرا بوفلان
عندي موضوع راح اتطرق له عن شي أخطر بكثير من سالفة الـ 10% مالت السيرفيس
شي من قلب يبط الجبد 🙁
في انتظار موضوعك
بوفلان حبيب قلبي، انت أولى الناس -طالما مدونتك تنشم ريحتها من الأكل-
تسوي تقرير عن قانون حماية المستهلك اللي مختص بالمطاعم
فقط زيارة سريعة تروح لهم وتسألهم واذا أمكن تاخذ صور من القرارات
وتحطها في المدونة وتفيد الناس، ولك الأجر من رب العالمين
والله الصراحه يبيله وباذن الله تتم زيارتهم
جان زين والله يتطبق هالشغلة بالكويت عندنا
واف ام المارينا مرة فتح نقاش عن هالموضوع وفي واحد مسئول اتصل وقال ان راح يتم حد لهذا الشي
وان شاءالله على امل
دائما المسؤولين في التصاريح الإعلامية يبيعون حجي بس عشان الناس تمدحهم
وبعدين القرار يقعد بالدرج لأن التجار مايعجبهم
الله يصلح الحال
ماراح يسوون شي راح ياخذون ١٠٪ للآسف
الى اذا كان هناك وقفه جديه من المدونين ووضع النقاط على الحرووف
اليوم أخذوا مني 8 دنانير لقاء السيرفس بنسبة 16%
والمطعم تابع لمطاعم سلسلة الشيراتون؟
http://www.aljarida.com/aljarida/ArticlePrint.aspx?id=22672
ال10% عادي ياخذونها
بس اذا كانت بمكان مو بارز نقدر ندق على حمايه المستلك
و اهما يتصرفون وياهم