مدونة أبوفلان تقنية ، أخبار ، تجارب شخصية ، مطاعم ، سياحة
.
بعد القرار العشوائي غير المدروس من وزارة التربية في الكويت بإطالة الدوام المدرسي يوم الثلاثاء ليكون إلى الساعه الثانية ظهرا
قرر المعلمين إقامة إعتصام أمام مبنى الوزارة للتعبير عن إستيائهم من القرار الفاشل الذي يدل على احتياج الوزارة للكوادر في الإدارة وليس في التعليم
لكن مادام الأمر بيد النساء فلن يأتي منهم خير
.
.
.
.
والدوريات حاضرة
.
.
شكرا أحمد الخرينج
.
اتمنا تكون هذي الخطوة الاولى لأخوانا المعلمين ..
وبنتظار اعتصام ساحه الاراده
الله يستر عليهم
فعلا قرار الوزيرة يدل على عناد لا اكثر
هذه كلمات وخواطر سريعة حول اعتصام المعلمين، الذي رتبت له جمعية المعلمين في الأسبوع الثاني من تطبيق القرار التعسفي الغير مدروس حول إطالة اليوم المدرسي إلى الساعة الثانية ظهرا.
# حسب ما سمعت أنه سيكون هناك اعتصام آخر إذا لم يتم الالتفات وسماع أصواتنا وسيكون بساحة الإرادة، والذي يجب أن يحضره (الجميع) وليس المعلمين فقط، فأنا أكرر هذا الكلام مسبقا وأكرره الآن… القرار لا يختص بالمعلمين .. بل يختص كذلك بالطلبة وعلى أولياء أمورهم أي جميع المواطنين والوافدين! فهذه المطالبة والاعتصام للجميع وليست للمعلمين فقط!
# أود أن أوضح أن الغاية من هذا الاعتصام (التعبير عن الرأي) الذي تحاول الوزارة بشتى الوسائل قمعه وإسكاته! وهذه بعض الحقائق التي يجب أن تذكر:
# سينتشر اليوم وغدا أن الحضور كان قليلا نسبة لعدد المعلمين الغير حاضرين.. لكن هذا لا يدل على شي!
# العدد الموجود يعبر وبكل قوة عن كلام جميع من لم يحضر.
# العدد الموجود الذي يعتبره البعض قليلا، لا يجب أن يفهم منه أن البقية مؤيدة لإطالة الدوام!
# العبرة تكون بعريضة الاحتجاج التي وزعتها جمعية المعلمين، التي تحتوي على تواقيع وأسماء العديد من المعارضين لها.
# حقيقة عن العريضة: المعارضين أكثر من التواقيع المجموعة، والسبب أن إدارات المدراس منعت توزيعها.
# لماذا العدد قليل؟ للعلم -حسب ما بلغني- أن بعض إدارات المدارس منعت المعلمين من الاستئذان والخروج من العمل لحضور هذا الاعتصام -والذي هو حق قانوني لأي موظف من موظفي الدولة، ولا يمكن منعه إذا كان يعارض مصلحة العمل! وهذا الاعتصام كله من أجل مصلحة العمل- ويا ليت قومي يفهمون ويعقلون!!
# لماذا العدد قليل؟ تعلم عزيزي القارئ أن هناك نسبة كبيرة من المعلمين الوافدين في الوزارة، الذين بالأساس تشربوا وعاشوا الاضطهاد والظلم في بلدانهم، فلا تلم أحدا منهم إن سكت وقال (سمعا وطاعة) لأن أساسا ما أتى إلى هنا إلا من أجل لقمة عيشه الذي لن يفرط بها! لكن هذا لا يعني أنه موافق على هذا القرار، لكن يتخذ طريق الأمان والسلامة!
# حسب ما بلغني -ولست متأكدا- أن الوزارة تعتزم عدم احتساب الأعذار الطبية والعرضية للمعلمين ممن تغيب عن هذا اليوم بالذات، سواء كان بالاعتصام أو غيره! (هل أصبحنا ندار بواسطة ميلشيات ومافيا) !!
..
نحن عندما نعارض على مثل هذه القرارات، نريد منها الإنصاف والعدل لا تحسب أن المعارضة من أجل (الكسل) فهناك أمور كثيرة في الوزارة تحتاج إلى إعادة نظر وإصلاح أكثر من تركيز الوزارة على إطالة الدوام دون تقديم أي دراسة أو توضيح أي غاية من هذه الزيادة!
وللحديث بقية . .
لكن مادام الأمر بيد النساء فلن يأتي منهم خير
!!!!
ليش يا بو فلان
بيد النساء؟؟؟
انا ضد قرار الوزيرة
وللأسف انت حطيت الموضوع في اطار مختلف بكلمتك هذي
يعني لو كان الوزير رجل شنو بيكون تعليقك
لو هو حضري مو بدوي
لو هو سني مو شيعي
لو هو من عيال بطنها مو ظهرها
🙂
كله عنصريه بغض النظر عن نوعها
هداك الله يالشيخ
ولو الحريم ما وراهم خير
ما جابتك حرمة
ولا حملت نطفتك حرمة
ولا ربت عيالك حرمة
…
شفت الحريم شكثر يجي من وراهم خير
؟؟
والله يا اختي الزين الكل يعلم ان قرارات النساء وتوايهم المناصب من المصائب
وشوفي اكثر الشكاوي من التسلط عند المديرات من النساء
لكن انا عندما اطلق كلمة النساء لا أريد الكل أبدا لكن أريد هالعوانس الي يمسكون المناصب ويطلعون بقرارات لاتخدم الا تفكيرهم الخاوي
كل وحده عمرها فوق الخمس واربعين ولا عارفه بيت ولاعيال ومجابله خلق الله وحاطه حيلها فيهم
لكن انتي وامي وام فلان وغيركم تكرمون عن هؤلاء ولا نشبهكم بهم
يا بو فلان
كما تكونوا يولى عليكم
حرمة لو رجل
العيب مو من الخيل
العيب من خيالها
والفساد والخنبقه تلقاها بكل مكان بالبلد بحريم وبغيرهم
🙂
وانت قاعد تحط البنات اللي ما جاهم النصيب ولا الله كتب لهم الزواج لسبب من الأسباب تحت اطار ومسمي تعلمته من اجدادك والتعليم ما غير مفهومه عندك
!!
وتفسر اخطاءهم لوضعهم الإجتماعي اللي انفرض عليهم وما اختاروه في مجتمع موضوع الزواج بيد الرجل اكثر من المرأة
رغم ان اي خطأ بالقرار يدخل فيه مسببات كثيرة وشخصية الإنسان سواء امرأة او رجل تدخل فيها مقومات ومكتساب مختلفه
ليش البنت اذا اخطأت يكون السبب لأنها عانس
والمتزوجة يكون لأنها تعيسه بحياتها الإجتماعية
والمرأة الكبيرة بالسن لأنها خرفت
والصغيرة بالسن لأن الحريم ناقصات عقل ودين
ليش دايم المرأة تتفسر على حسب وضعها الإجتماعي وعلى اساس عمرها!!
خطأ صغير بالتعبير دخلك بمتاهات اخرى واضعفت من طرحك لقضية مهمة
اسمح لي على التدخل
الموضوع اختي العزيزة أن المرأة إذا لم تنشغل بعملها الرئيسي وهو التربية وتقوية اساس المجتمع انصرفت الى عمل لا يناسبها بسبب الفراغ الذي تعيشه وبالتالي يتم استغلالها وادخالها اللعبة السياسية والمصالح
وهذا هو الحاصل في وزارة التربية
لو تلاحظين معي الكثير ممن يطالبون ويدعون باعطاء المرأة حقوقها هن من النساء اللاتي تجاوزن الخمسين و هن بلا ازواج لذلك تسلطوا على المجتمع
انا حينما اطلق كلامي عن فئة فأرجو أن يفهم منه البعض وليس الكل
لأني أتكلم عن مناصب قيادية في وزارة معينة وبالتالي اقتصرت الكلام من بدايته على هذه الفئة فقط
واي وصف اطلقه عليهم هم فقط لانهم انشغلوا بما ليس لهم وغيرهم في نفس العمر ونفس الحاله الإجتماعيه وهن بعيدين كل البعد عن المعمة ومصادمة المجتمع بقرارات تعيسه
فالخلل في هذه الفئة بعينها فقط لا في الكل وان شابهوهم بالوصف والحال
في وحدة دااااشه عرض بالسالفة …
…
موضي الحمود إنسانة غبية وهذا الشيء تلاحظة بأي تصريح تطلقه هذه النكرة ..
ونورية الصبيح كذلك .. قرارات عشوائية طائشة لمجرد إثبات الوجود ..
…
اعترف …
رايح هناك تحتج ولا تصور ؟ < اختار الخيار الثاني بر الأمان
…
انا بس عندي تعليق صغيييير هالاحتجاج شبيطلع من وراه ؟
شتبسوون مثلا ؟
اقنعوني
اذا واثقين انكم قادرين تسوون شئ قولولي شبتسوون وشلي يخليكم واثقين
مابي اذكر احتجاجات سابقه وهم داخل حلقه التربية والتعليم قالوا وقالوا وتالي طخوا وتطبق النظام والكل ساكت الحين من سنتين اقرب سالفه < اييه فيه اكثر من سالفه
…
انا بقول ان كان هالشئ قامتكم عبروا احنا بلد الحرية والتعبير
انا من رايي ان الوزيره تطلع تقول مبرراتها
ليش زادة الوقت شنو مصلحتها واحنا اصلا ما نسوي شئ إلا وراه فايدة فشفايدة هالنشاط والوقت
طالبوا انها تطلع وتتكلم لا تحتجون فقط
قبل كل شئ تذكروا ان طلعوا ناس وقالوا ويييييين النشاااااااط نبي نشااااااااااط من سنين عدل كلامي ولا خانتني الذاكره
وصدقوني انا واثق بنسبه 100% كل الوثوق ان هالنظام راح يتطبق بحذافيره واذا بتغير شئ بتغير النظام والحصص وهالسوالف بس الوقت اهو اهو ما تغير
واذا شالوها من الكرسي بيحطون واحد او وحده تأيد تقول ابي بيقول بدرس النظام وعطوه اسبوعين بيطلع ويقول انا مأيد هالنظام وبيطلع ويا جم مأيدين ويدعمونه وخلاص سيره وانصكت نفس كل مره جذي
صدقوني انا ابي الافضل ووالله العظيم ما يهون علي اليهال الصغار بالمدارس وبهالحر صيييف مووت ويحرام متى بيتغدون متى بينامون ومتى بيدرسون متى بيكون لهم وقت فراغ يمارسون فيه انشطتهم بغير عن المدرسه وتعطونه مجال يكتشف الحياة
لمن نقول لعيالنا عند مدرسه يتحطم معنويا يدري انه طول اليوم ما راح يسوي شئ ما راح يمارس اي نشاط يحبه ينطر الويك اند يلعب كره ويا ربعه يسوي اي شئ يفرغ طاقته يبدع من نفسه يكتشف نفسه بنسفه
انا اقول عطوها فرصه اوكي ناطرين بنتحمل بس اذا انقلبت الموازين تحملي كامل المسؤولية
بعطيكم معلومه بسيطه الوزارة تطمح انها تكون من الدول المتقدمه
وطبقه افكار من الدول المتقدمه لكن بتقنيات للأسف رديئة وقديمة وبدائية جدا والأجانب متطورين لأبعد حدود توهم حاطين الصناديق وكل صندوق قفل ومفتاح !!!
والصناديق عند الأجانب اولا مثبته بالطوفه = ( بنيان مدرسي مهندس ومدروس عدل ) ثانيا ماكو اقفال عندهم شخباري الحين ارقام سرية وهذا أأمن لسببين اولا ممكن الطالب يضيع او ينسى المفتاح عمدا او عن غير قصد وثاني شئ مو مفتاح واحد يفتح كل الاقفال ونبوق ونتطفل على خصوصيات الغير !!! وايد صارت مشاكل من هالنقطه حتى الطلبه استغنوا عن الصناديق صارت للزينه ويا ألوانها الغريبة الي مالها معنى ألوان المهرج اصفر احمر اخضر ازرق قوس قزح حشى مو صف صالة خيمة سيرك
وسالفة انهم يطولون اليوم الدراسه عند الأجانب الطلبة ينامون هناك وانا يوم كنت صغير الدراسه بأمريكا كانت غير جدا جدا مختلفه الطلبة ينامون هناك نظام الأكل غير كل شئ غير عاد هذا من سنيييييييييييييين شوفوا الحين شصار
على فكره مو كل شئ يسوونه احنا نسويه اهمه غير واحنا غير تقاليد وافكار مختلفه هناك بنات وصبيان مدرسة وحدة الخلط من ايام الروضة لليمن تحصل الوضيفه ولا وياك بنات بعد ليمن تمون والبنات يبجون على قبرك
احنا غييييييييييييييييييييير حتى جونا ما يساعد لا يتسسبون على اليهال والله مو كاسر خاطري غير عيال الابتدائية يحرام
عموما باجر بيبين الصح من الغلط
الوالد علّق على موضوع إطالة الدوام المدرسي بجملة واحدة
قال “شيخة مرة” !
أتمنى أن لا ينقلب الموضوع حول محور آخر وهو (قيادة المرأة) فقضيتنا أكبر! الحال يحكي وبكل صراحة وللأسف الشديد أن القياديون في التربية خصوصا -وفي الدولة عموما- رجالا ونساء -ليس الجميع- قراراتهم غير مدروسة وعشوائية.
ما أريد توضيحه أن (السالفه ضايعه) من فترة طويلة بظل قيادة الرجل أو المرأة، فلا نُرجع سبب المشاكل للجنس، بل المشكلة في العقول وطريقة الإدارة، فلا أعتقد أنه باستلام (رجل) سترجع الأمور إلى نصابها حاليا، بل من يحمل على عاتقه الإصلاح والتطوير بعدل وإنصاف هو من سيكون المنقذ سواء كان رجلا أم امرأة!
وإن كان الحق يقال نسبة توافر الحل عند الرجل أكبر من المرأة والسبب يعود للمجتمع الذي نعيشه، فمجتمعنا لم تعاصره أبدا النماذج المثالية للقيادات النسائية حتى نستبشر خيرا، أو أنه وفر الجو لتدريب القيادات النسائية بشكل خاص.
للعلم في اليابان الشعب يزعل اذا كثرت الاجازات بالسنه ويطالبون بانها تتوحد ليش لانهم يحبون بلدهم ويبونها تتطور واحنا المعلمين اللي المفروض يعلمونا ويزرعون فينا حب هالوطن قاموا يعتصمون والله شعب يفشل ,, انا بعرف انتوا لو تشتغلون بالقطاع الخاص جان شتسوون اللي من ال8 الصبح حتي 3 العصر ولو تداومون بالبنوك لا والله للاسف شعبنا مو مال شغل شعبنا شعب زواج الاجانب واكل وتفلسف
مدة الدوام الدراسي بالكويت هي الأقصر بالعالم، أمريكا وأوربا الى الساعة 3 العصر، حتى لو كان جوهم بارد، في دول جوهم حار مثل عمان والهند الدوام عندهم أطول من عندنا، واللي يضحك على الهند ياريت يوصل نص تعليمهم.
بعدين كل الوظايف مدة دوامها 8 ساعات إلا المدرس 5 ساعات، والحين مسوين لويه علشان زادوهم يوم واحد بالأسبوع !
الله يعين المعلمات وخاصة اللي يدرسون صبيان تعبنا
والله والله ان اللي يحط القرارات هذي اللي ماتفيد التربية ظالم وماراح يستفيد شي يضيعون الوقت تعبنا ياوزيرة لمتى
اذا ماتكلمتوا يامعلمين خاصة الرجال يقدرون يروحون
ويعارضون ويدرون على كل شي تكفون فكونا من سالفة
هالاطالة تعب وضغط وازعاج والطلبة صبيان
مزعجين حيل بس يراكضون جنة بالمدرسة حرج ربي لو صورت المنظر اليوم كان ضحكتو
الله يعينا
من زين الجو …. ماتشوفون الجو حار وماله داعي الإطاله …
وبعدين لما يبتوا الوفد الكوري علشان يقيم التعليم
عندنا … قال إن التعليم فاشل ومايحتاج إطالة الدوام
لما يتطور التعليم يسمح بإطالة الدوام …
مادري شنو مستفيدين من هالمناهج وإللي باطه كبدي
المعادلات س وص مادري لما نروح الجمعيه بسوي المعادلة
علشان أعرف كم حسابي …
دورولنا مناهج تربويه …نفسيه … أسريه …تكنلوجيه
شي انعيشه بواقعنا علشان نقدر نتعامل مع أفراد المجتمع…
سوونا كتب عن السلبيات في المجتمع مثل البويات والجنوس
والجنس الرابع
سوولنا أنشطه تحبب أولادنا بالمدرسه، أهلوا المعلمين
كيف يديرون الحصه ويخططون لشرح الدرس علشان يهضمه
الطالب…
غيروا الروتين اليومي من طابور وخلوه نص ساعه رياضه
أوثمثيل أو تقليد ..
خلو الراس اليابس وشوفو مصلحة البلد…
مالا داعي التحيز للراي والتمسك بالدكتاتوريه والتحدي
الناس الي حطت القرار كانوا قاعدين بالظل ولا حاسين بالطلبة ولا بمكيفات المدارس المنهريه
كلامك عدل والله
ابي اوصف مدرستنا
صندوق الكهربا مكشوف
صف اللي ادرسة مافي تكيف وكل يوم نشتكي يجيبون عامل ويسويها ويروح
ولا تشغتل والصبيان موقادرين يدرسون
غرف المعلمات والله والله دفعنا انا ومجموعتى فلوس عشان نصبغ ونزينها عشان تفتح النفس
وسوينا اللي علينا
وطلبنا مكاتب ماجبوا بالمرة وبعد سنتين جابو طاولات كبيرة جنها طاولة طعام
قلنا يلا
الله يعزكم مافي دورة مياة كل البيبان متكسرة
يعني مافي كلام
المدرسة كبيرة وقديمة
صبغنا بامر من الناظرة
والله الصف انظفة قبل لادش
ودايم الفراشات ينحاشون لان الشركات مايعطونهم فلوس
وغيرة وغيرة لو اكتب بتنصدمون
وين وزيرة التربية من مدرستنا دامها مهتمة بالتربية
والتلميذ
نسيت اقول شغلة
كمبيوترات ماالها طاولة وفوق هذا يبون التطور
لاحد يقول وين المديرة ليش ماتهتم لان مافي ادارة
كل كورس مديرة جديدة وكل وحدة تقول خل نمشي الوضع
ومستحيل اللمعلمة اللى تدش المدرسة تنتقل
الله يكفينا شر هالقرارات المفروض ان القرارات تؤخذ من المعلمين
يعني المعلمين اهما اللي حطون قررات التربية مو اي شخص مايدري عن المدرسة والتلاميذ ويبي طول النشاط
تصدقون مدرستنا ماراح تسوي نشاط ونشاط على مايروح التلميذ لصفة يخلص الوقت
والمدرسة تعطي من عمرها احنا نبي
شي يفيد المدرس ويشوقة للمدرسة والتعليم عشان يعطي اكثر مو يضغطون علية
ويبونة يدرس
الذمة والضمير مع كل معلم
لكن القرارات تخلي الواحد مايعطي الا القليل