مدونة أبوفلان تقنية ، أخبار ، تجارب شخصية ، مطاعم ، سياحة
مشكلتنا في الكويت أن القرارات دائما تكون غير مدروسه وسريعة التنفيذ دون وضع ضوابط أو دراسة للقرار وتبعاته
فبعد قرار وزارة التجارة بايقاف ومنع المطاعم من تحصيل رسوم للخدمة كان المفروض يصاحب القرار ضبط ومراقبة لأسعار المطاعم
وان كنت أعلم أنه لايوجد قانون يحدد أسعار المطاعم الا قانون واحد يحدد سعر البيبسي وصمونة الفلافل !
المهم هنا أن المطاعم كلها التزمت القرار وأزالت رسوم الخدمة وقامت برفع اسعارها وأصبح السعر الجديد أغلى من السعر القديم مع احتساب الضريبة ! يعني كأنهم ينتقمون من المواطن بسبب قرار الحكومة !
مطعم تشيليز رفع سعره مره أخرى وهو قد رفعها من قبل شهرين او ثلاثه قبل الغاء رسوم الخدمة
أيضا مطعم روبي تيوز داي رفع أسعاره مع منيو جديد
مطعم ميت كومباني أيضا سمعت أنه رفع سعره
برأيكم ماهو الحل الأمثل لمواجهة المشكلة ؟
برأيي لايوجد الا المقاطعة لكن تحتاج حملة توعوية قوية جدا
.
تبي الكويتيين يقاطعون المطاعم…………انت اكيد كويتي؟
يقاطعون ليش لا
الاستغلال الكل يرفضه الغني والفقير
بسم الله الرحمن الرحيم
انا بالنسبه لي اشوف انه المقاطعه
هي الحل الامثل لمثل هذه المطاعم
لكن يبيلها وقفه جاده خصوصا من روادها المعتادين
الخلاصه 🙁 حمله المقاطعه اذا صارت سوف تاتي ثمارها بعد شهر او اقل خصوصا اذا العالم قاطعت صح وبالذات بنهايه الاسبوع والله اعلم )
تحتاج حملة قوية حتى في وسائل الإعلام سواء صحف او غيره
الانطلاق فقط من المدونة لن تنجح الحمله للأسف
مشوار الالف ميل يبدأ بخطوة يا ابو فلان
شد حيلك
السلام عليكم
اخوي بوفلان والله انت قلتها صج انسعرو بس انا اليوم بدبي متعشي بشيليز صراحه على غلى دبي بس شيليز نص سعر الكويت. ياليت اعرف شلون ارفع الفاتوره وتشوفون الفرق .. بل كلونا
وعليكم السلام ورحمة الله
عوافي ان شاء الله ودولة مثل الامارات عندها قانون وحماية مستهلك وتجد اللوحة في كل محل مع رقم الاتصال لتقديم شكوى
اما بالكويت للأسف يغيب القانون
فكره ناجحه
اقتراح لأسم الحمله
( اكل البيت اوفر )
اشكرك يالمشعان الى الآن الفكرة موجودة لكن تحتاج جهود وتعاون كبير مثل حملة الانترنت
تقاطع !!؟؟ تقاطع !!!!!
ليش أنت سعودي مثلاً
السعوديين يموتون بشي اسمه مقاطعه هههههههههههههه
شعب واعي
يلا .. على أيدك .. حط لنا هاش تاق مقاطعة .. واحنا إن شاءالله نحاول قد ما نقدر
مو المشكلة مو بالهاش تاق المشكلة بالأفعال وانا اخوك
لاتروح صوب اي مطعم بالويكند مالك مكان 🙂
انت جرب .. مشوار الألف ميل يبدأ بخطوة ..انت افتح الهاش تاق بعدين احكم ..
معاك ألف حق
انا ذاك اليوم بشيليز، و من زمان مو رايحتله، و تفاجأت بالأسعار
اللي كان ب٢.٢٥ صار ٤.٢٥، و اللي كان ب ٣ صار ب ٥ و هلم جرا على الباجين
و عالأقل شيليز حاط أسعاره و ناشرها. اشرايك انا ذاك اليوم في فات برغر و دفعوني اسعار زيادة على اللي في المنيو؟ و يوم قلتلهم ليشو قالوا احنا زدنا الأسعار بس ما حدثنا المنيو… بالله هذا كلام معقول؟
و مو بس شيليزو الا وايد محلات من الملابس الى المكياج و الكلونيات
الأسعار صايرة خيالية بالكويت و الطمع زاد عن حده و حماية المستهلك بعز النوم
حسبي الله ونعم الوكيل والتجارة غايبة ولا في قانون يردع
لا نقدر نقاطع لاتقولون مانقدر شوفوا السعوديه تقاطع واخر شي يخضعون لهم شوفوا تجارب غيرنا وتعلموا
لا نقدر نقاطع شنو بنموت لو ماناكل الا هالمطاعم الله يزيد النعمه بس
صدقت لكن للأسف ظاهرة المطاعم جدا مرتفعه عندنا بالكويت وعليها اقبال بشكل لايوصف وبالتالي تعويد الشعب الكويتي على سياسة المقاطعه وتثقيفه مهمه حتى لو لم تنجح الحمله
تظل الفكرة موجوده
بصراحة يا اخوي لو كل فرد في الدولة عرف قيمته وقوة كلمته ما كانت المطاعم رفعت الاسعار ، يعني لو فعلا هالمطاعم متأكدة من أن الشعب راح يعمل مُقاطعة ما تجرأ ورفع الاسعار ..
مشكلتنا أننا نرضى بذلك ، يعني عادي لو رفعوا الاسعار مية بالمية ، ما راح يتغير شي والناس راح تشتري ..
بس لو توحدنا كلنا وقمنا بالمقاطعة شوف شو راح يصير في هالمطاعم ..
هذه مشكلتنا … والله كريم .
صدقت لولا الشعب ما استمر التاجر يوم واحد في تجارته
صراحة انا من اول ماطلع القرار وانا مستغرب
القرار خطأ مليون في المية..
ضريبة الخدمة هي قيمة خدمتك وانت في المطعم من قبل النادل, ماتبي تدفع الضريبة, خل طلبك Take Home واخدم نفسك بنفسك..
الحين اش صار, صارت الضريبه على الكل, اللي بياكل داخل وبرى !!
صراحه يذكرني بقرار, شطب الديون على المديونين..
هالقرارات الغير مدروسه والعاطفيه دايما تجيب العيد..
المفروض يكون فيه قانون واضح للأسعار
الضريبه المفروض تكون ملغيه
او ثابته وليست بنسبة ١٠ او ١٥ ٪ من الطلب وترتفع وتنزل
ابو فلان
مالكم الا المقاطعة
مثل ما انجبرت شركة المراعي تنزل اسعارها وتوزع منتجاتها على الجمعيات الخيرية [قبل ان تفسد بسبب المقاطعة]
راح تنجبر جميع المطاعم على ضبط اسعارهم
وماراح يضر اذا الشخص غيّر نوعية الاكل الى شاورما وفلافل وبروستد من المطاعم الصغيره لين تعرف المطاعم المشهورة كيف “تنتقم” من الشعب
واتمنى تكون بداية الحملة من عندك هنا يابو فلان
مدونتك من اشهر المدونات الكويتيه ماشاء الله تبارك الله وصوتك مسموع بإذن الله
أنا من رأيي هنا يأتي دور المدونات … فلوا قامت المدونات الكويتية بحملة توعية مخصصه لمطعم معين و من ثم ننتقل لباقي المطاعم … فستأتي بنتيجة كما حصل مع شركات الإنترنت .
ضغط من الشعب + إصرار = ضغط حكومي على الشركات
ضغط حكومي + ضعبي = رضوخ التاجر لما يريده المواطن
معادله بسيطة
السلام عليكم
والله انا اقترح المقاطعه ولاجل غير مسمي
ايجاد بدئل للمطاعم
طباااخ او طباخه الله لا يهينك يسوي قوائم اكل نفس اللي بالمطاعم جم بياخذ كا شهر 200 دينار هم انتو موفريين
لان اقل اوردر بمطعم قاعد تدفع من 25 – 40 د.ك
والاكلات موجوده بالانترنت للجميع ومن جميع مطابخ العالم
وفي ناس متخصصه تدرب العماله على الطبخ
عندي صديق جذي مسوي يايب هنديه وعليها تبارك الرحمن طباخ مو طبيعي
عيوش – اكلات اوروبيه – برجر – سيفود
اضعف الايمان تكون متاكد من نظافة الاكل وجودته
حتى البرجر قاعد ينباع عند محلات اللحوم اللبنانيين وبالنكهه اللي انت تبيهاوالاجبان كذلك متوفره والصوصات
فالباجي يتوقف عليكم انتو
واذا هفت نفسك على المطاعم خلها تصير مره بالشهر كتغيير روتين
اعتذر عن الاطاله
مشكورين
همتكم يالمدونين.. يمعوا المطاعم اللي زادت اسعارها وحطوها كلها في بوستر ونسوي حملة مقاطعة وننشرها واتس اب منتديات ايميلات بلوقات.. وياكم قلبا وقالبا
ايه الموقع اللذيذ ده
لكم منى اجمل تحية
هههه ضحكت على تعليقين مع ان لهم معنى مقارب, لكن واحد جابه بأسلوب حلو والثاني ما وفقه الحظ
التعليق الغير موفق واللي حصل على أعلى dislike:
“تقاطع !!؟؟ تقاطع !!!!!
ليش أنت سعودي مثلاً ”
============
التعليق الذكي:
تبي الكويتيين يقاطعون المطاعم…………انت اكيد كويتي؟
==========
عموماانا سعودي, وأقول اسعاركم حريقة في الكويت, صايرين أغلى من دبي, يعني مش ناقصين زيادة أسعار!!!
لكن قرار الغاء الخدمة, غير موفق أبدا
في العالم كله, ضريبة الخدمة موجودة غير الضرايب الثانية ان وجدت, يعني هل يقارن اللي يجلس في المطعم مخدوم محشوم في طاوله في موقع مستأجر ويندفع على الموقع أجار وكهربا وصيانة وغيرها, مثل اللي ياخذ وجبته ويروح ياكل بيتهم؟؟
في اخر رحلة لي زرت الكويت-لبنان
وكل من سألني أقول له ان مطاعم الكويت أفضل من الموجود في لبنان بمراحل, لأن المطاعم اللي هناك جابوها الكويت, وعندهم مطاعم مافي أمل تلقاها في لبنان (غير المشاوي)..
في الكويت الغلا مش بس في المطاعم, في كل شي ..
أسعار الأراضي مثلا خرافيه ! ولا تتناسب مع الدخل حتى وإن كان نسبيا عالي..
دبي وأبوظبي الحين صاروا ارخص من الكويت..
بس ارجع واقول ضريبة الخدمة مالها دخل 🙂
أقول ياصـعوطي
تعرف معمر ؟
لا أعرف الطبطبائي وفيصل المسلم 🙂
تعرف مطعم اصفهاني؟
والنعم فيهم والله..
يارب تقوم في حملة مقاطعه وحنا وراك بالي تبي .. والله اكل البيت ابرك بمليون مره لكن الناس هذي اخربت ماقامو يطبخون وينوعون بالطبخ
والي ما يعرف يجيب طباخه براتب 80 دينار بالشهر والماجله انت شاريها شاريها
أحلى شي لما الملك عبدالله زاد الرواتب و قال أبي اشوف تاجر يرفع هلله وحده بس!
المفروض قرارات مثل هذي تخرج من مسؤول عادي لكن اغلب المسؤولين تجدهم متواطئين مع التجار ويسكتون عنهم
مافيه مثل اكل البيت والله يخلي كتب الطبخ وخلو الدعوه هوايه ومزمزه
السلام عليكم
اذا كان الحل تبيه من الحكومه يجب وضع هيئه مستقله للرقابه
وطبعا الشعب لازم مقاطعه للتأديب مثل مافعلوا السعوديين بالمراعي
قدرتوا بتوفيق الله على القيام بحملة ضد الإستخدام العادل للنت ..
ما راح تصعب عليكم حملة ضد رفع الأسعار ..
محبكمم من السعودية ..
الله يحييك ياطارق
فعلا الحمله كانت قوية وبتضافر جهود الجميع
اعتقد بنسوي حمله نحصي فيها اي مطعم رفع أسعاره
المطاعم يجب أن يكون فيها رسوم للخدمة, المفرض ما يلغوها لكن يضعوا نسبة معينة لا يتجاوزها المطعم
انا اشوف ليش كل ما رحت مطعم المينيو متغير
عشان يزيدون الاسعار
ومايقولك الجرسون اذا سألته يقولك تجديد بس
عدل عدل كفو بوفلان والله معاكم وخوش حمله راح تصير وتطخ الاسعار مثل ماسويتو مع استخدام العادل حمله قويه ووشالو الللمت المعين فـ خلـ نسوي هلـ حمله ضد المطاعم مادري ع شنو رافعين الاسعار ولو تقارن الجوده بلـ اكل تلاقيها سيئه بنسبه. للفرع بلمطاعم نفسه حول العالم !! أنا اقول. تسوي هلـ حمله بوفلان وحنا معاك وبعدين مدونتك ماشاء الله معروفه بلكويت فـ راح تسمع خوش اصداء ؛)
كلامك 100%
بس وين اللي ينظم هالحملة ؟؟!!!
ما اعتقد الناس راح تقاطع المطاعم حتى لو زادو الاسعار علني مثل ما قلت نحتاج حمله كبيره بالمدونات مثل حمله الانترنت وحدود الاستخدام .
للاسف ماوجدت اي مدونة متكلمه عن هالموضوع الا انت
وهذا معناه ان الايد الوحده ماتصفق ويبيلك ناس بدون شك عندها قاعده جماهيريه يقدرون يشاركون ويوعون الناس ويوصلون الرساله
ادري اصلا من يوم قرار الضريبه وانا ماكل بالمطاعم لاني متأكد اميه بالاميه انهم بيزيدون الاسعار دبل الدبلات ويعاقبون الشعب على هالقرار ,, المهم مالت عليهم وعلى طبخهم اكل البيت افيد وكلش كلش الفاست فود والله يرحم الحال
بالنسبه للدبي والله ارخص من الكويت بكل شئ تروح كارفور تروح مطاعم فنادق اي شي تروح له بدبي ارخص من الكويت
حنا كل مايعطونا زياده يرفعون الاسعار دبي لا حبيبي في رقابه عشان الي يقول دبي اغلى من الكويت قبل اقوله بطل عيونك عدل الناس تعلمت وحنا نايمين بالعسل ,,
بالتوفيق يابوفلان في الحمله
الحل هو نشر حملة المقاطعة في الواتس آب…
بالضبط ولازم ماتوقف الرساله عند احد وفيها اسماء المطاعم الي ارفعت الاسعار
روح يابو فلان وحنا وراك
بس انصحكم انكم تنسقون مع باقي المدونات
وشوف النتيجة شلون بتصيييييييييير
شفيها صمونه الفلافل والبطاط … والله ابرك من هالمطاعم اللي ماندري شسالفتها مع الاسعار يحسسوني انهم يطبخون بماي ذهب مو دهن طبخ ….
تحياتي
هههههه ما من حل لان احنا نحب ألي يستغلنا ويدوس على راسنا بالاسعار !!! شعب ميت عالمضاهر وعقليه صفر بس
بالنسبه للاسعار أسعار جنونيه للمطاعم المودرن مقارنه بأسعار السلع الاستهلاكية مثلا سعر خيشه عيش 50 كيلو 5 دنانير. وسعر كرتون الدجاج 1300 كيلو جرام 8 دنانير. فاذا ذهبت الى المطعم وطلب 3-4 اصناف الفاتوره طقت 40 دينار. ولكن المطعم مكان زين لتقير الجو والاستجمام.