فحص فيتامين د

 

 

توجهت قبل يومين الى أحد مختبرات ياكو ( مختبرات تابعة لمستشفى العدان تشرف عليها شركة خاصه بمبالغ رمزية ) لعمل فحص لفيتامين د وفحص شامل أيضا ، بسبب شعوري بآلام في العظام من اسبوعين

ومن أهم ما يسببه نقص فيتامين د هو آلام العظام التي قد تصل بالشخص الى البكاء من شدة الألم كما حصل لغيري من الناس

فيتامين د عند نقصه يسبب اضطراب في النوم وآلام في العظام وضعف في العضلات والكثير يغفل عنه ولا يعرفه وقد يفشل الكثير من الأطباء في تحديد سبب آلامك في العظام عندما تكون بسبب نقص فيتامين د

 

هذا النوع من الفحص غالي الثمن في المستشفيات الخاصه سعره تقريبا مابين ٣٠ الى ٤٠ دينار

وحتى أبتعد عن الدفع وأبتعد عن أخذ موعد لدى دكتور العظام في المستشفى الحكومي ويتم تحديد موعد لاحق وتحضر من الساعه سبع الصبح فضّلت دفع مبلغ 14 د.ك لمختبرات ياكو ، الى جانب 10 د.ك للفحص الشامل ومثل مايقول المثل حط فلوسك في الشمس واقعد في الظلال

لكن نتيجة فيتامين د بعد اسبوعين ونتيجة الفحص الشامل بعد يوم واحد !

 

اذا كنت تعاني من آلام في عظامك ولاتعرف السبب فاذهب لفحص فيتامين د وخذ الجرعات المناسبة إما أبر أو حبوب لتعويض النقص لأنه فعلا متعب هذا الفيتامين !

 

34 تعليقات

  1. سلامات !!! ماتشوف شر !!!
    أنا آكل جنك فود وانت يصير عندك شي بالعظام !!! غريبة
    حوّل على الجنك فود
    🙂

    ماتشوف شر ان شاءالله 🙂

    • الشر ما اييك والله يسلمك

      الجنك فود مايوكل عيش هالأيام 🙂

      ناطر النتيجة بس اعتقد انه فيه نقص لأن الوضع مو طبيعي

  2. ماجور إن شاء الله تعالى وبإذن الله ما فيك إلا العافية
    ولو تنطر شهرين تقريبا يسوون لك التحليل ابلاش ..
    والله حكومتنا ما تقصر …

    الله يعينك على الابرة الله يأنك بتطامر من العوار ..

  3. سلامات ما تشوف شر
    أهم شي يكون المختبر ثقة لأن ممكن تكون النتائج غير دقيقة زي ما صار في اختي. في مختبر عطاها نتائج غلط وخافت وراحت دكتور ثاني وعاد لها التحليل وطلع غير … قدامك العافية

    ملاحظة: ترى نقص فيتامين د يضر العين و يزيد من نسبة الإصابة بسرطان الثدي عافانا الله واياكم، و كل ما كانت بشرتك داكنة زاد احتياجك انك تقعد بالشمس لفترة أطول

    • الشر ما اييج

      والله صحيح بعد يمكن هالشي فعلا اعرف وايد ناس تحاليلهم عادوها واطلعت عكمس التحاليل الأولى يمكن من الشخص نفسه مايكون صايم ويمكن من المختبر قديم او شغلهم مش حالك

      الله يكفينا شر الأمراض

  4. سلامات ما تشوف شر يا بوفلان ، تشمس تشمس < بس مو تان
    الشمس زينة حق الفياتامين دال

    • الله يسلمك دكتور المستقبل

      والله خوفك اتشمس تصير فيني حروق من الدرجة الثالثه هاذي شمس الكويت يامعود

  5. سلامتك ما تشوف شر و بالسلامة عليك .

  6. تحتاج انك تعرض مايعادل 50 بالاميه من جسمك لشمس يوميا لمده 20 دقيقه علشان تاخذ حاجتك من فيتامين دي، منو يقدر يسوي جذي بالكويت؟ خلك قاعد في بيتكم وطيحله حبوب وأبر 🙂

  7. سلامات يا ابو فلان
    والله على كلامك يابو فلان من ستة اشهر حاشني عوار بالظهر ورحت مستشفى السلام عند دكتور عظام
    واول ما فحصني قالي سوي تحليل فيتامين د وبعد ما سويت طلع عندي نقص حاد اعطاني حبوب عى مدى شهرين وثلاثة ابر كل شهر ابره وقالي اشتر شورت واقعد تحت الشمس كل يوم وبعد ثلاثة اشهر سويت التحليل طلع اوكي
    معلومات ممكن افيدكم فيها
    ١- تحليلها يطول اسبوعين تقريبا لانها يسونها برا الكويت
    ٢- ابر فيتامين د ما تحصلها بالصيدليات الا بالمستشفيات
    ٣- بين كل ابرة وابرة فترة كبيره شهر تقريبا لانها قوية حيل
    ٤- اهم مصدر للحصول على الفيتامين اهو الشمس

    وتحياتي للجميع وماتشوف شر يابو فلان

    • ربي يشافيك وماجدامك الا العافيه ان شاء الله

      فعلا مورسات الإبر بينهم شهر ويقولون الدوا الي فيها حاااار يجوي جوي 🙂

      عاور الظهر هو الي مأذيني والحين عوار في اليدين مع ضعف في استخدامهم والله المستعان

      شكرا على المعلومات يالحبيب

  8. ماتشوف شر يابوفلان ..

    مع انه شمسنا ماشالله لاهوب بس نسبه الناس الي عندهم نقص فيتامين د عاليه بالكويت !
    تشمسوا حتى لو من ورا الدريشه ههههههه

  9. مرض نقص فيتامين د منتشر انتشارا كبيرا في الكويت ياريت الكل يسويالفحص والسبب عدم تعرضنا لكميه كافيه من الشمس ومو قصدي انه تتنقعون بالشمس ولكن تعرض جسمكم لبعض أشعه الشمس وترى مستشفيات الحكومه يونه ببلاش بس يطول ولا تنطرون حتى عظامكم تعوركم لأنه راح تتفاجأون طبعا بعضكم بنتيجه التحليل حتى لو لم تكونوا تشتكون

  10. الف لاباس يا ابو فلان وطهور ان شاء الله

  11. سلامات و ما تشوف شر يالغالي !!
    بس توقعاتي مع شوية من التأكيد أنهم يقولون لك فيك نقص فيتامين د >> الله لي يقول طبعا !!
    و اذا قالولك هالشي ارجعلي و قولي شدراك ؟!
    أما اذا مافيك شي فالحمد لله على الصحة و حافظ عليها !!
    🙂 🙂 🙂

  12. عاد شكثر اعرف طقو ابرة فيتامين دال !!

    يقولون تذبح من العوار !!!

    نصيحة قبل لا تاخذها
    تنقع بالشمس و الا دور لك بديل اي شي
    حبوب !!

    و لا تاخذها .. عوارها جايد

    و ما تشوف شر

  13. زين ماسوييت ونحن على طرريقك ساائرون

  14. الله يشافيك وما تشوف شر يارب

    اممم صاج نقص فيتامين دال يسبب بلاوي وحلو الواحد يتلاحق عمره قبل لا تصير هالبلاوي

    لان انا نقص فيتامين دال سبب لي بلاوي والآلآم حتى المشي صعب علي وكل يووم اطقها بجوه قبل لا انام من الالم لوول

    بس بخصوص الابره انا صارلي فتره اخذها صج تعور اول ما يطقونك حالها حال اي ابره بس ترى عادي ما يستمر الالم اكثر من 5 دقايق :/

    والله يشافيني ويشافي كل مريض 🙂

  15. ما تشوف شر يا بو فلان، قبل فترة واحد من الأهل كان يحس ببعض التعب لكن تم تطنيشه أو بالأصح طنش نفسه لأنه كان مسوي رجيم خرطي فكان متوقع هالأعراض لكن وصل به الحال إلى أن كف إيده صار خشن لي صافحته جنك مصافح ليفه عندها راجع الجلدية وطلبوا منه عمل فحص فيتامين دال والنتيجة كانت صاعقة له.

    عطوه مثل ما قلت كورس ابر، وطبعاً على حسب حدة نقص الفيتامين يحدد الدكتور أيهو الأفضل الإبر أو الحبوب وعدد الجرعات، الإبر ما حصلها إلا بالواسطة صايرة مثل بيض الخعفق.

    على فكرة يُقال أنه مافي شي اسمه “تحليل شامل”، أنا اللي فهمته من دكتور مرة تناقشت معاه إنه مو مثل ما نتوقع يطلع كل شي، الأصح إن الواحد يراجع دكتوره ويشكي أي أعراض يحس فيها ويطلب منه الدكتور تحاليل محددة.

  16. سلامات ما تشوف شر يا بوفلان
    خطااك السو …

  17. ماتشوف شر يابو فلان و اقعد من ساعه ٧ الصبح لي ٢ الظهر بالشمس تشبع فيتامين د شبابنا مو مقصرين كل يوم يقعدون عالبحر تحت الشمس خخخخخخخ

  18. ناصر العجمي

    ماتشوف شر وعلى فكره بو فلان ياكو عيبهم شي واحد انت عطوك اسبوعين وتطلع تحاليلك وانا عطوني ٣ ايام على فكره الاخ اللي موجود على مكتب الكاشير وتسجيل بمزاجه يمشي ناس اذا اشتهاك ظبطك ب٣ ايام انت واسلوبك معاه انا جربت شي هذا عندهم وعموما فيتامين د اعراضه كثير مو بس العضام يأثر على الغده الدرقيه ويجيب الكأبه وله تأثيرات كثير جيك غوقل وتعرفو عليه اكثر والله يكافينا نقصه ويشافي جميع مرضى المسلمين

  19. سلامات ما تشوف شر و ان شالله ما تحتاج الابره بس يعطونك حبوب

    بس مختبر ياكو لازم تحويل من المستشفى العدان ولا عادي اروح و بس؟

  20. ابوفلان زين انك قريت موضوعي في منتدي الموشر نت وطبقت كلامي لزم تخلي الناس المتخلفه تفهم

  21. ناصر العجمي

    بو فلان توني سويت فحص فيتامين د عن مختبر الانصاري كلينك بميدان حولي سويته ساعة ٦ ساعة ٧ خذيت النتيجه والله يكون بالعون ان شاء الله كل شي بخير وسعر الفحص فيتامين د بسعر ٢٥ دينار والغده بسعر ٢٤ دينار واحسن شي عندهم سرعة بنتيجه ونفسيتهم حلوه انصح فيهم وشكرا

  22. ماتشوف شر

    ماعليكم امر ابي رقم العياده ياكو

    امي تعبانه وتعاني من الالام العظام والحكوومه يحسرررون بالوواحد ومواعيدهم طواله

    اذا ماعليكم امر قولولي جم رقمهم وين مكانهم

  23. السلام عليكم انا فني في المختبر
    وصدقني نتيجة تحليلك للفتامين د راح تطلع عندك نقص
    وصدقني ولا واحد من المراجعين الي جوني في المختبر طلعت نتيجته سليم
    للعم انا اشتغل في المختبر الحكومي
    وابي منك طلب ترسلي نتيجة التحليل
    واذا امكن تجي تسوي تحليل عندي في المختبر علشان اسوي مقارنه مع النتايج
    مالت المستشفى و المختبر الخاص

  24. للعلم اجهزة تحليل فيتامين د
    موجوده اجهزته داخل الكويت وعلى حسب علمي الصباح و الاميري و الجهراء موجود الجهاز عندهم
    بس العدان وغيره من المستشفيات الله العالم قبل سنة تقريبن كان يتم عمله في فرنسا

    والله قهر تحليلي يروح فرنسا وانا ماروح قهــــــــــــــر

    بس يالله الله يعز الكويت

    ويعدل وزارة الكحة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.