الى متى التأخير يا Aramex ؟؟

 

يبدو أن شركة أراميكس تعاني من أزمة مع السائقين !!

لا أعلم ماسبب تأخير الشحنات وجلوسها في مقرهم لمدة اربع الى خمس ايام ولايتم توصيلها ؟

أو يتم توصيلها يوم الجمعه قبل الصلاة بدقيقتين كما حصل معي !

 

الشحنة الأولى جلست عندهم من يوم ١٩ الى يوم ٢٤ وتم توصيلها يوم ٢٥ !

 

 

الشحنة الثانية من يوم ٢٥ موجوده عندهم واضطريت اليوم الذهاب بنفسي لاستلامها !

 

أعتقد أني سأذهب لشركة أخرى وان اضطررت لدفع زيادة دينارين أو ثلاثة

 

37 تعليقات

  1. فعلا صاج يابوفلان نظامهم هني صاير الله بالخير والمشكلة يغثونك لما تشوف خدمةالاجانب الي طالب منهم يوصل صندوقك بسرعة وارامكس يعل الجبد مع اني استغرب بالسعودية ماشاء الله سريعين بالتوصيل بس الظاهر شبعوا وفسقوا
    المشكلة الشركات عندنا قليلة وفي شركة جديدة الي اسمها بوسطة بلص ارخص من ارامكس سجلت فيها لكن للحين ما طلبت شي لان مو ببالي شي صراحة اشتريه (:

    • البريد الحكومي عدنهم أسرع من البريد الخاص الي عندنا للأسف

      في حال طلبت ياليت تعطينا تجربتك

      • خلاص ان شاء الله اول ما اطلب ابشر اول واحد راح يعرف انت
        وعلى بريد السعودية صدقت اللهم لاحسد لكن لما نشوف ماشاء الله تقاريرهم الي طالب من النمسا والي طالب من المانيا والي طالب من اثيوبيا (:
        وحنا هني نتحسر على بريدنا وغاسلين ايدنا منه صراحة لو يخصخصونه احسن مو بس جذي ميت دماغيا

  2. هذا اللي تطرقت له من سنتين تقريبا ولما رحت دي اتش ال ارتحت معاهم بس عيبهم انهم مايوصلون الطلبيات وتالي خاروها معاي ورديت اراميكس مرة ثانية والحين كل الشركات مو ذاك الزود

    في كذا شركة ثانية بس ماجربتهم للامانة

    • ناس تمدح وورد شيب وناس تقول فيديكس

      االشركات وايد لكن يايفرقون بالسعر يا بسوء الخدمة

  3. مو غريبه عليهم حاشتني مناعه منهم عشان جذي كل ماشوف شحنتي طلعت من المطار واستلموها بالعارضيه ادق عليهم يجهزونها لي عشان استلمها !

    لانه حتى وقت التوصيل للبيت مواعيدهم الله بالخير ايي حزت الدوامات !  

    • مرات يرفضون يعطونك الشحنة بنفس اليوم..ويقولون لازم يفرزون الشحنات وبعد يومين تستلمها..

    • واذا مادقيت يقولك هي في مخزن الشحن ولا مخزن التوصيل وهو نصاب يقدر يدش ويطلعها لك

  4. بوفلان كلامك عدل ، و بعد عندهم شي جدا ينرزف : موقعهم جداً متخلف بالنسبة لشركات التوصيل و متابعة الشحنات جداً تعبان يحطولك انه الشحنة بنيويورك ٣ ايام ماكو تحديث ولا مكتوب شي ، فجأة الشحنة بالكويت !!

  5. عندك مثال احسن نظام متابعة شحنات شفته فدكس شحنتك وين و متى و منو استلمها و وين رايحة + توقعات الوصول

  6. اللحين لمن توصل الشحنة العارضية تقعد يومين وبعدين يوصلونها…قبل كانت تقعد يوم واحد
    هذي شحنة من يوم ٢٥ ولحد اللحين ماسوولها ابديت !
    http://img62.imageshack.us/img62/4053/screenshot20110430at922.png

    خدمتهم من سيء الى اسوآ ~_~”

  7. فالح الدوسري

    انا متهاوش معاهم يوم الخميس

    ونقول الله المستعان

    دق عليهم
    ١٨٢٠٠١١
    وكلم محمد مسؤولهم وقدم شكوى
    اعتقد محمد الحداد – سوري

    زيدوا الضغط عليهم

    كانت بثلاثه اول نص كيلو وزادوه دينار وزادوها مية وخمسين
    بس الخدمة كل مالها تصير اردى

    من يذكر ايام يوم كانت ست ايام عمل ويدقون يقولون متى يناسبك نوصلها

    الله المستعان

  8. مشكلة ارامكس الوحيدة الي تحسب الشحنة بالوزن
    باجي الشركات تحسبها بضرب طول وعرض الشحنة
    مادري الا اذا غيروها الحين ياريت تفيدونا

    • كل شركة لها سعر ولها طريقة في الحسبة

      اراميكس كان ب ١.٢٥٠ والحين وصل ٣.١٥٠ والخدمة كل مالها وتسوء

  9. يارباااااه
    هذي مدة طويلة حييل
    انا بنفسي اروح اجيب الشبمنت لان مكانهم قريب عليي ولكني اتحلطم على فترة التفتيش

  10. والله شوف ابو فلان شركة TNT تعاملت معها تجيبلي بضاعه من الصين في خلال يومين لا ويوصلونها لك للبيت يعني ما يحتاج تروح .. هم صراحه ريحوني مره استعملت شريكات كثيره .. و صراحه TNT تبيض الوجه .. تعامل معهم و راح تدعيلي 🙂

    • اشلوون اسعارهم لأنهم من الإسم باين عليهم أسعارهم تفجييير وغاليه 🙂 ؟

      • لاء اسعارهم زينه مرره .. ادفع 35 دولار على البضاعه الوحده .. 🙂 جربهم ما راح تخسر شئ صدقني.

  11. يا يبة هذا يهون ولا يدق عليك السايق ونفسيتة بخشمة لا ويدق دقة ويسدة ويوقف عند باب البيت مايتعدى الثواني محد طلع مشى ويخليك ..

    والا تدق علية مو عاجبة كلامك يسد الخط بويهك !!!

    حلاتة قبل لا يوصل لك الشحنة يتصل عليك يشوفك وينك متى يقدر يسلمها لك مو جك بم الا اهو عند الباب !!

  12. الله المستعان العرب اذا امسكوا سلطه خربوها

    انا انصح بشركه وورلد شيب عندكم ميزه تجميع الشحنات وهذا يوفر فلوس كثيره عن تجربه

    وموعد الوصول من خمسه ايام الى سته من امريكا

    طبعا يعطونك عنوان خاص بامريكا
    وفيه اكثر من ميزه بعد ادخلوا الموقع وشوفوا

  13. بهالموضوع …. حط فلوسك بالشمس واقعد بالظلال …. تعامل مع فيدكس

    بس لا تلومهم…. اصلا الكويت كلها مترين بمتر والشركات اصلا مو مقتنعه بسالفة التوصيل يعني نسبة الطلب بالمقارنة للدول الثانية ولا شي ، لو تحسبها بالعقل تشوف ان ما تسوى يطلع يوصل طلبية اهي مالها قيمة ، فتشوفهم مخلينها ليمن تكثر الطلبيات وتالي يطلعونهم دفعه وحده. يعني المصيبة وراك وراك

  14. انا اروح استلم شحناتي بنفسي
    و لا منتهم و توصيلهم و مكانهم قريب و سهل اجبال الافينيوز 😉

  15. التوصيل فعلا سيئ ولا بعد بالجهرا اوف يحسسونك انهم لازم يختمون جوازاتهم علشان يوصلون لك الطلبيه

    يقولون لك تاخذ يومين الى ٣ ايام للتوصيل ! علشان الجهرا بس

    يمكن قوقل ايرث خدعهم وقالهم الرياض ههههههه

    بس احسن شي تروح وتاخذها بالعارضيه وتمر جوني روكتس وتاكل ميني روكت وانت راد شي حلو صراحه ^_^

  16. اي والله اتفق مع جميع الردود الخدمة من سيء الى اسوأ وكل مالهم يردون للخلف، حاشتني سالفة معاهم وهي كالتالي:
    عندي ثلاث شحنات وصلوا الكويت فقمت ودفعت عالنت حق الشحنة الاولى وتفاجأت ان الموقع عطاني ان العملية مرفوضة بس وصلي مسج و ايميل ان تم الدفع وانخصم المبلغ فاتصلت عليهم والا الاخت تقولي مافي مشكلة احنا نبلغ الادارة المالية وانت عادي كمل وادفع حق باجي الشحنات. المهم لما وصل مندوبهم سلم البضاعة وطلب قيمة التوصيل اللي بالاساس انا دافعها وقام سايقنا ودفعله، ويوم كلمتهم قالي شخص نجيك مع الادارة وندق عليك بس عطاني طااااااف من قلب ولما كلمتهم مرةثانية وقلتلهم عيب تكشتون بعملائكم واحنا اللي المفروض نأمن فيكم على بضاعتنا تقولي الاخت ميخالف لان اللي كلمك كان من فرع ارامكس الاردن (انا شكو مادري) !!! المفروض اني اكلم شركة ارامكس مو اقعد اسأل انت من اي فرع الكويت والا غيره
    اسف طولت بس صج قاموا ينرفزون وما انصح احد يكمل وياهم الا اذا عدلوا خدمتهم وادارتهم.
    شكرا

  17. صارت معاي , شحنه ما طولت عندهم و شحنه قعدت عندهم اسبوع و شي

    و شالسبب ما ادري !

  18. آرامكس شركة متخلفه من ساسها الي بـ NY الى العليميه الي بفرع العارضيه .. ولا لاب توب حاطينه تصنيف FOOD و كل موظف يقولك كلام من راسه لما اخر واحد يقول افتح الكرتون ماندري شنو داخله , وين قاعدين ؟ زبون انا ولا طرار !؟

  19. بس دايما ريحتهم حلوه ! اعتقد يستخدمون ” داوني ” 🙂

  20. ملاحظين بعد انه ارامكس لو تطلب اكثر من شغله من نفس الموقع يحسبونهم شحنتين

    انا صارت معاي اول ما نزل الايفون طلبت اثنين احسبولي كل واحد شحنه غير مع انه طالع من ابل بحشنه وحده

    يمدحون فيديكس ويقولون يوصلون عطورات وادويه كل الشركات ممنوع عندهم هالسوالف بس ما ادري عن اسعارهم

    بس بالسرعه اكيد اسرع

  21. فعلا صايرين مو مثل قبل يتاخر زياده شحنهم اذا وصل
    طلبي وصل بعد ثلاث ايام في الانتظار بالكويت
    عندي اشتراك في اكثر من شركه بجربهم مستقبلا وشوف الفرق

  22. تخلف تخلف تخلف شركه قمه بل فشل الذريع وتمنى لو نقاطعهم افشل شركه بل عالم

  23. انا اتعامل مع شركه dhl , واهي احسن شركه بالنسبه لي اكذر شي دفعته 21 ينار طبعا على 8 فساتين وكرتون عالكبر !!! اما TNT حسبي الله عليهم 30 دينار على فستان واحد !! هذااسمه نصب واحنا ما نقدر نتكلم بس نتحلطم وندفع 🙁 لحد يتعامل معها وانا اقول انه حظوووظ

  24. نصيحة للجميع ولكم لا حد يتعامل مع الشركة هذا ارمكس شركة فاشلة ومحتاله يستلموا حساب الارساليات من الناس و يلطعونا بليومين والثلاث ولما تتصل على خذمة العملاء كل كلامهم الان ارسلك ايميل شكوه وبس
    الله يخلي البريد السعودي اسرع منهم وارخص منهم

  25. طيب بوفلان ولى يعافيك شنو افضل شركة تعاملت معاها ؟ او إللي تنصح فيها ومو مشكلة الفلوس المهم سرعة التوصيل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.