مطعم كارينوز .. Carinos

,

مطعم كارينوز : مطعم يقدم الاكل الإيطالي , الباستا والبيتزا بالإضافه الى الستيكات .

مكانهم : على شارع الخليج يعني ع البحر .

أول ماتقعد إييبولك هالخبزة الحاره اللذيذة مع زيت زيتون .

المقبلات

مشروم محشي سبانخ مع ثلاث أنواع من الجبن

الطبق كان لذيذ جدا بما أني من محبي المشروم

وهذا طبق البيتزا اللذيذ جدا جدا من اختيار الأخ عبدالله الأنصاري

بيتزا مع دياي وهلابينو يحرق حرق

وهذا طبق الروبيان مع التوست وخلطة الجبن والكريمة هالطبق جيد نوعا ما مع انه مافيه شي مميز بس مقبول طعمه

الأطباق الرئيسية

سندويتش بانيني بالدجاج وخلطة الطماط

ماذقتها الصراحه بس صاحبي يقول إنها حلوه

والطبق الثاني الي هو طبقي غير الموفق

أسوأ وأسوأ وأسوأ ستيك ذقته بحياتي

طبعا الشرهه مو عليهم علي أنا الي رايح مطعم إيطالي وطالب ستيك !! مع انه نينو ستيكهم لذيذ بس هذول حسبي الله عليهم

اللحم تقول صارله سنتين مو مطبوخ ناشف حده يالله ينبلع

وهذا عصيري الليمون بالنعناع وهو الأسوأ أيضا <<< والله أعلم إنها حوبة ام فلان تقولي ودني هالمطعم وانا مو راضي  و أقولها مكانه مايصلح حق واحد ومرته وطلع كله عوايل وانا عبالي كله شباب 🙂

,

التقـــــــــييم

جودة الاكل 6 / 10

الخدمة 6 / 10

المكان 8 / 10

الأسعار 8 / 10

,

15 تعليقات

  1. شكله الرجيم ر ح يخترب

  2. يالله ما عليه .. خيرها بغيرها ..

    بس عط صور للجو العامة للمطعم ..

    الستيك شكله لحمة فخذ عبد بغينيا .. ههههه

    بالعافية وهني .

  3. مشكور على البوست يا ابو فلان

    كارينوز ما عمري دشيته
    بس الستيك بالصوره مو حلو ويخرع
    لو انا مسؤول بالمطعم فراح الغي هالوجبه

    بس عجبني بيتزا الدياي وبانيني الدياي والمشروم من الصوره يبدون لذيذين
    هني وعافيه 🙂

    • العفو يابوحمد 🙂

      والله قعدته حلوه ومكانه حلو خاصه انه يمه البحر يعني تروح تاكل وبعدين معاك الشاي والقهوة وتقعد ع البحر هالأيام الجو حلو

      والستيك على قولتك ما ودي اتذكر خلني ساكت 🙂

  4. المدونة جميلة وأسلوبك رائع و لكن سؤالي و سؤال كثير من أصدقائي أنهم يشككون في الذبح الإسلامي للحوم المطاعم الأمريكية في الكويت فما رأيك أنت؟
    شكرا

  5. يا أهلا وسهلا فيك اخوي

    والله يا أخي أننا نحمل اللحوم المستوردة من الخارج على الأصل :
    فلو جاءنا لحم منهم نحمله على الآتي :

    1- ان الأصل جواز الاكل من ذبائح اليهود والنصارى . ( وطعام الذين اوتوا الكتاب حل لكم )

    2- أننا نحمل من تحل ذبيحته على الأصل , حتى نتيقن من عدم شرعية العين المذبوحة .

    ثم يا اخي الحبيب أننا إذا كنا نعلم ان المذبوح تم ذبحه على غير الطريقة الإسلامية فلايجوز لنا اكله
    واذا كنا نعلم انه ذبح على الطريقة الشرعية جاز لنا اكله
    واذا كان محل شك فالأصل حمله على الحل لأن النبي صلى الله عليه وسلم لما قدمت له اليهودية الشاة التي تسمم به لم يسألها عن طريقة ذبحها

    وفي الحديث الصحيح الذي روته عائشة : أن قوما قالوا للنبي صلى الله عليه وسلم : إن قوماً أتونا بلحم لا ندري أذكروا اسم الله عليه أم لا ، فقال : (( سموا عليه أنتم وكلوه ))

    والله أعلم 🙂

  6. يبدو انه اسوأ مطعم على التاريخ يمر على ابو فلان ملك المطاعم

    غلطة الشاطر بألف وانت غلطتك ما طلبت الاكل الايطالي المشهور مثل البيزا والباستا..الخ << مابي اتفلسف وايد

    صراحة صج صورة الستيك تخوّف تحس فيه شبهه وباين من الصورة انه مو مشوي ١٠٠ ٪ شوف الخطوط الي عليه شلون عوج يعني من شبك الشوايه !! هذا الله يسلمك يحطون سيخ على النار ويچوون فيه اللحم ويسوون هالشكل على بو مشوي على اللهب

    وبالنسبه للاخ الي يقول ان المطاعم الامريكيه في الكويت لحمها ماهو حلال
    فاغلب المطاعم ال عندنا ياخذون لحمهم من شركات لحوم كويتيه
    مثل المواشي والحميضي وامريكان ومن هالطقه
    ومع ذلك انا حاليا افضل المطاعم السعوديه لانها بدأت تنتشر عندنا مثل الطازج وهرفي وكودو

    • لا مو أسوأ مطعم بس أسوأ طلب طلبته

      وفعلا لازم تطلب بكل مطعم طبق من اختصاصه

      بس طريقة ستيكهم مو نفس ماذكرت الله يخليلك فتافيت هههههههههه يحطونها بشواية كبيرة مضلعه شفته وهو يشويها وبعدين تصير جذي

      أما طريقتك الي تقول عنها يسوونها اذا كانت الشواية مسطحه مافيها حديد بارز <<< اح احم لاداعي أدري معلومتي خطيره

      موفق يالحبيب الهاشمي رضي الله عنك

  7. السلام عليكم..
    تسلم ايديك على التقربر الحلو … وعوافي … وخيرها بغيرها…
    بس الصراحة انا من محبي هالمطعم وللأسف انا اقولك انك للأسف ما توفقت بالأختيار …
    اذا تبي نصيحتي..
    عندك السلطة .. التاليان ويدج شكلها غريب بس طعمها لذيذ..
    المقبلات الناتشووز ما يتطوف..
    الطبق الرئيسي أي طبق من الأطباق الإيطالية ممتاز
    المشروب خلك على الماي انفع ..
    وشكرا

    • وعليكم السلام ورحمة الله

      والله يعافيج

      فعلا ما توفقت فيه

      وان شاء الله الزياره الثانيه اجرب مقترحاتج بس الله يعين على فلفل الناتشوز 🙂

      شكرا على الإفادة

  8. يم يم انا رحت له قب جم شهر كنت بطريقي للاكوابارك جان اجوف مطعم اسمه غريب علي وكنت بوقتا حدي يوعانه بس المطعم شي اكله موطبيعي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.