إنسان يعيش داخل سياره في الكويت !

.

.

بعد حملة فريق الإزالات التي أزالت الأخضر – من زرع وأشجار – ويابس – من ديوانيات ومظلات – كان مكان هذه السياره غرفه يسكنها سايق البيت

ومن المؤسف أن صاحب البيت لم يجد إلا توفير سياره من نوع ” فان ” وتغطيتها بطربال أزرق ورفعها على بعض الصخور لتوفير مسكن للسايق

للأسف فالبعض يظن أن كون السايق هندي أو بنغالي فهو ليس من الجنس البشري ويشعر بشعورهم

اذا كانت هاذي السياره لا تصلح لتربية الحمام فكيف ياصاحب البيت هانت عليك نفسك ليسكنها إنسان !!

.

20 تعليقات

  1. لاحول ولا قوة الا بالله .. لو زوجته قالتله ابي ابنيلي مطبخ بالحوش .. جان نقز وسواله احلا مطبخ

  2. لا حول ولا قوة الا بالله .. الله يعين الفقارى والمساكين على هالاشكال المجردة من الانسانية

  3. مادري شقول .. بصراحة شي ينرفز .. يعني بدال لاتشتري تلفون حق ولدك .. ابنى حق هالمسكين بخار على الاقل !! .. ما يطوف الميه دينار الله يسامحك ! .. مسكنه بسياره !!
    يا ناس ارحمو من بالارض يرحمكم من بالسماء .. ويقولون ليش مافي مطر !

    • كان حاطله غرفة جينكو بس شالوها البلدية

      الحين هالسيارة العجيبه

      الله يكون بعونه

  4. هذا الرجل إستخدم أقل الأمور تكلفة .. وتسد الحاجة تقريبا !!!

    الله يهديه بس

    وإن شاء الله يكون هالأمر مؤقت حتى يوفر مسكن كريم لهذه النفس !!

  5. اذا امكانياته ما سمحت له يوفر غرفة للسايق
    عيل ليش اييب السايق من الاساس اصلا ؟
    و اذا امكانياته ضعيفة لهلدرجة
    ليش السايق و ليش يخرب سيارة طول ابعرض مع انه كان يقدر يستفيد منها و يسوقها هو او احد من عياله
    ولا السايق و الخدامة صار فرض عليه ؟؟؟؟؟؟؟؟؟؟؟؟؟؟؟

    والله اعرف لي صديق
    ماشالله تبارك الرحمن
    عيلته 5 نجوم بصراحة
    فيلا و مواقف و عيشة رغد
    ما يعتمدون لا خدامة و لا سايق
    الحريم مسؤولين عن البيت و الحريم بعد يسوقون
    و العيال عندهم و اخوانهم الكل يسوق
    و اذا بغت امهم و لا اختهم تروح مكان ما تسمع من اخوها ولا ابوهم غير هالكلمة ( ابشري بعزج )
    ليته كل بيوت الكويت جذي
    والله جان تخف مصايب الخدم و السواقين 1000 بالمية
    لان المعاملة السيئة لهم و عدم توفر ادنى مقومات حقوق الانسان اهي اللي تخليهم يتشدغون و ينحرفوا عن مبادئهم و تلقى اخبارهم بالديرة كلها واحد سرق المعزب واحد نهب المعزب و هرب واحد حرق بيت المعزب و واحد و واحد

    ياخي لو ما تقدر تتحمل مسؤوليتهم و تكرمهم عشان تضمن ولائهم لك ليش تييبهم من الاساس و تبتلي فيهم ؟؟
    صح الكلام يا ابوفلان ؟؟

    والله شي يقهر 🙁

    • ماشاء الله فعلا قليل ماتجد الرجال في هالوقت يتحملون مسؤولية البيت كامله

      للأسف الأغلب يتكئ على الزوجة والنساء لتدبير أمور البيت وهو يجلس مرتاح البال

      البعض يشوف عيب زوجته تسوق سيارة لكن مو عيب تطلع مع السايق لحالهم تناقض مؤسف

      وكلامك عدل ياتوفرله مكان يا رده ديرته

  6. لا حول ولا قوة إلا بالله ..

    مثل واحد ينوم الخدامة بالممر .. مال المطبخ ,,

    وين حقوق المستأجر المسكين ..

  7. اخوي العزيز بعض الناس بيوتها اقل من 300 متر،ومستغلين البيت كله،وكان عندهم غرفة خارجية للسايق،وبعد الازالة ما لقوا مكان للسايق وهم محتاجين لوجوده،فبعضهم شرى له فان وحطه فيه،وبعضهم مثل الاخ اللي بالصورة وسّع الفان حتى يوفر مكان لائق بانسان،وصدقني بعض السواويق يجي من ديرته ساكن بين الزبايل و ما عنده ما يغطيه من المطر والشمس،يعني هم راضين بالشي هذا

    • بيتهم 400 وراهي وديوانيه

      القضية ماهي قضية منه

      النبي صلى الله عليه وسلم أوصى بالخدم وقال أطعموهم مما تأكلون وألبسوهم مما تلبسون ولا تنهروهم

      يا اخي انت تنام بفراش مريح وتخاف على ظهرك وهالمسكين بروحهه عايش بغربه ويكد ليل ونهار وماتوفره مكان يرتاح فيه

  8. باشباب شفيكم هدو هدو البيت شكلة خوش بيت مواقل من 140 الف شفيكم وشي ثاني قاعد تقولون فقر وفقر وين قعدين اتحد واحد فيكم يشوفلي بالكويت خبزه يابسه وربي حته القطاوه عايشه ديرت خير وعز .. بس الخ تخطيطه خطى لو بادي صح لقاله سنع في بيته بس عشانه هندي خله يولي موضوع تافه وثاني شي السياره فيه الغراض من فوق ماتوقع غرفه بس الناس تدور سوالف وشكرا

    • والله يا أخوك البيت كبير ويقدر يدبرله ألف مكان لكن النفس عنده رخيصه

      على الفكرة السيارة عند ديوانية الربع وأنا مصورها واعرف حال السايق

      السيارة من فوق مافيها أغراض هو الفان يكون موديله مرتفع من فوق ومغطيه عشان الحر والشمس

      ما يدري ان شمس الكويت ماتعترف بالعوازل مو الطرابيل هاذي تزيد الحر

  9. اخويا العربي ..

    مع احترامي لك في بلادهم عشان هما فقارى يدوب يجيبو قيمة اكلهم مو مسكنهم ..

    ولا مستحيل يكون معاهم فلوس ومايبني لو بيت لكن الضروف اجبرتهم انهم يسكنو في الزبايل ..

    ومين قالك انهم راضين ومبسوطين بالشمس الي تسلخ جلودهم وبالبرد الي يشقق جلوده ؟

    ياخي شوية رحمة لو تخيرو بين سكن محترم ولا بين زبايل
    بديهي حيختار سكن محترم ..

    الحيوان الي هوا الحيوان يروح يختارلو زاوية محترمة ينام فيها

    ماهو عذر ابدا انو عشان ابغى اوسع بيتي اروح اسكن السايق في سيارة ومن ابسط حقوقه السكن ولا عشان هما غلابة نفتري فيهم !!!!!

    للاسف احنا مسلمين لكن مانطبق كلام النبي :-
    المعرور بن سويد شاف ابو ذر عليه حلة وعلى غلامه زيها
    لما سأله قال انو في عهد الرسول عير رجل بأمه فقالو الرسول(إنك امرؤ فيك جاهلية, إخوانكم خولكم جعلهم الله تحت ايديكم, فمن كان اخوه تحت يده فليطعمه مما يأكل وليلبسة مما يلبس ولاتكلفوهم مايغلبهم فإن كلفتموهم فأعينوهم )

    فمابالك بسكن الي هيا مكان راحته ونومه ويمارس فيها حريته ..

    بالله ترضى اخوك يسكن سيارة عشان ماعندو وضيفة وراتب
    يستأجر بها بيت اقل شي تسويه انو تسكنه عندك

    بس ماني عارفة انتو ايش نظرتكم للعمال الي من دول فقيرة !!

    اما اذا مو قادر يوفرلو حقوقه ويعيشه كأنسان
    فيسيبه ويروح يشتغل ويودي ويجيب اهلو بنفسه .. والراتب الي يروح للسايق يحطو في بيته ..

    اذا يقدر يدفع راتب للسايق فمعناته يقدر يوفر مبلغ
    ويبنيله او ياجرلو غرفة ..

    لكن احنا نستكثر انو نحط فلوسنا في ادمي بنظرنا ماهو
    انسان يستحق التقدير والإحترام ..

    لو كانو يربو حيوان كان تلاقيهم مسكنينو احلى واكبر
    قفص والاكل منوع عشان لايمرض والادوية والكشفيات اذا مرض

    ربنا فوق وعادل مايرضى بالضلم وكمان تدين تدان
    زي مايضيقو على خدمهم ربنا حيضيق عليهم وراح يجي
    يوم ويتعاملو بنفس الطريقة

    ولما ربنا يسألهم ويحاسبهم ليش ما أوفيتو حقوقه
    ايش يقولو لربنا ؟ عشان والله بنوسع بيتنا فماصار لو مكان
    سكناه بالسيارة !!

    ربنا ينتقم من ذي الاشكال الي الإنسانية والرحمة بعيدة
    كل البعد عنها >_<

    وبلاش نضحك على انفسنا بحجج بس عشان نبرر ظلمنا وموقفنا الغير إنساني ولا هو من اخلاقيات المسلم والي ينم مع احترامي عن حقارة صاحبه

    شوهو دينا الإسلامي الي يحث على الرحمة والعطف والإحسان
    حسبي الله ونعم الوكيل

  10. ما عندك مكان ليش تييب سايق !!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.