فندق سفير .. Safir Hotel

.

فندق سفير يقع في منطقة الفنطاس في الكويت على البحر وبجانبه شاليهات الدانه

الفندق جديد لم يمض على إنشائه سنة الى الآن

قمت بزيارة للفندق للسؤال عن عروض العيد ورؤية المطاعم فيه

.

الفندق من الداخل :

أولا : الإستقبال وفيه كافيه وقعده حلوه ع اليمين واليسار صورت جهه وحده بسبب وجود عوائل في الجهة الأخرى

.


.

ثانيا : الغرف وأسعارها ( عرض فترة العيد الأضحى ) :

الغرف الي سألت عنهم نوعين :

* السويت : سعرها 100 د.ك الليله وهاذي هي الي صورتها .

* الديلوكس : سعر الليله 45 د.ك لم أقم بتصويرها وهي أصغر طبعا من السويت

عباره عن غرفه وحمام فقط الله يعزكم ايضا حجم الحمام أصغر من السويت ومافيه جاكوزي .

.


.


.


.


.

ثالثا : المطاعم ( يوجد ثلاث مطاعم وكافيهين ) :

* المطعم الأول اسمه Flavors عباره عن بوفيه مفتوح وسعر الشخص فيه 9.500 د.ك بدون المشروبات .

.


.


.

.


.


.


.

المطعم قعداته حلوه ومكانه وسيع وشرح لكني ماجربت اكله ان شاء الله لاحقا

.

* المطعم الثاني : مطعم Chit Chat مطعم أمريكي عبارة عن طلبات وعندهم برجر وبحري .

.


.

* المطعم الثالث : مطعم الروشنه للمأكولات الكويتية ( لم يتم افتتاحه وقت زيارتي للفندق قالي الأسبوع القادم سيتم الإفتتاح ) .

.

مرافق أخرى بالفندق :

* يوجد أيضا نادي صحي في الطابق الخامس من الفندق وحمام سباحة

* ويوجد حديقة خلفية قريبة من الشاطئ فيها ألعاب قليلة وبسيطة للأطفال .

.

مشكلة !!

كان عند البوابة زحمه شديده للأسف والحارس يفتش كل سيارة على حده أضف الى ذلك الوقت الذي يستغرقه ليذهب الى الكبينه ليفتح الحاجز وعلى هذا المنوال الى أن قرر الجميع عمل ثوره واشتغلنا عليهم هرنات الى أن فتحوا البوابه وسمحوا للكل بالدخول والمواقف كانت صغيره جدا مما تسبب بزحمه داخل مواقف الفندق أيضا !!

.

.

سبب الزحمه !!

كان سبب الزحمه هو إقامة معرض للمنتجات في الطابق السفلي للفندق !

الصراحه حركه مالها داعي كونك فندق ولست صالة أفراح وتسبب زحمه على زبائنك ومسوي تفتيش عند الباب !! والمواقف قليله أيضا

والمصافط مصكرها بشريط أحمر بأبيض تقول وزارة الأشغال شغالين بالشارع !!

.


.

الفندق طبعا بالعادة لاتوجد فيه زحمة وهادي جدا ومطل ع البحر والشاطئ وبالتالي الي وده يروح ترا يديد وشغله الى الآن نظيف .

عفوا 🙂

.

21 تعليق

  1. يه يه
    ماشاء الله شغل عدل والله ، عساك أتهنى دوم وتونس الأهل
    الصور معبرة جدا وتدل أن المكان يستاهل !! مع اني دايم امر صوبه بس ولا مرة دخلته ؟
    وعيدك مبارك مقدما

    • الله يبارك فيك يابوناصر

      فعلا المكان بما انه جديد ونظيف يستاهل الصراحة

      والله يبارك فيك مقدما

  2. حلو ماشالله عاد قبل فتره كنه ندور عروض فنادق وشاليهات للعيد وننحاش من مصاريف العيد مافكرنه فيه لان توقت البحر يكون بعيد عن الفندق.

    شــكرا بوفلان

    • لا البحر قريب من الفندق والغرفة الي صورتها مطلة ع البحر بس رايح بالليل مايبين عدل

      والعفو أختي

  3. حلو والله وبسيط كان ودي اشوف شكله من الخارج بصراحه ما اعرفه

    وبخصوص المعارض شلون مالها داعي اساسا تقام بالفنادق

    عادي عموما انت داش كزائر بديهيا التفتيش باجر ان شاء الله لمن تصير زبون يفرشون لك الفرشة الحمره

    ويسلمو عالبوست

    • شكله من بره عادي

      والمعارض صح تقام في الفنادق لكن لما تكون المساحه تسمح باقامة معرض

      بالنسبة للتفتيش كان للمقيم والزائر عشان جذي الناس كلها قامت تطق هرنات

  4. الله يعطيك العافية على التقرير، والحقيقة أتساءل هل الفندق يحتوي على مرافق أخرى مثلا نادي صحي وكافيه وحدائق أو أماكن مخصصة للأطفال، لأنها أمور بتصوري مهمة أيضا.

    • الله يعافيك

      تم اضافة المعلومات سألت عنها وأخذت فكرة عنها بس يوم كتبت البوست نسيتها وانت ذكرتني يعطيك العافيه

      نعم فيه بالدور الخامس نادي صحي ومسبح

      وفيه حديقة لكن ألعاب الأطفال قليلة جدا

  5. الله الله لو تشوف بس الزحمه بالرياض … على الأقل في سبب و السبب مؤقت شغل يوم يومين …. أحنا الزحمه في أشياء مجهوله … و مافي شارع الا فيه حفريات و صيانه … الله يعين على هالدنيا .. 🙂

    • الرياض مشكلتها بالكثافة السكانية اللهم بارك

      الله يعينكم فترة من الفترات زرت الرياض لمدة شهر الزحمة حتى بالبقالة 🙂

  6. تسلم على التغطية ، والله نحتاج للتذكير بهالاماكن خصوصا في قلة الاماكن السياحية في الكويت ، الواحد مايدري وين يروح هالايام !

    • الله يسلمك يالغالي

      فعلا احنا أهل الديره ماندري وين نروح

      الناس كلها بالمجمعات والمطاعم للأسف

      مافي مكان سنع تروحله

  7. يعطيك العافيه بوفلان دايما متميز

    الفندق حلو ماشاء الله

    لكن ماتلاحظ معاي ان الساحل صوب الفنطاس حرمو منه المواطنين وصار الشاطئ كله فنادق وشاليهات وراحت علينا احنا 🙁

    • الله يعافيك يابومحمد

      اي والله كل مالهم ويصكرونه

      أول عند ديوانية الصيادين كان البحر مفتوح والناس تروح تقعد وتتعشا

      الحين صكوه وشوف اشبيسوون مكانه

  8. يعطيك العافيه خوش شي

    هذا مو اللي كان بالرقعي اول ؟

    • الله يعافيك

      والله ما ادري بالضبط وين كان بس هذا اتوقع فرع ثاني بالإضافه للموجود ان كان موجود أصلا 🙁

  9. سبقناك وحجزناه من أسبوع يا حلو وراح نعطيك أخبار استخدامهو تفاصيل أكثر بعد أسبوع .. تعرف عيدي قبلكم ( يوم الملجة ) :>

    • ايييه يله تتهنا ان شاء الله

      بس هله هله بالتقرير والإيميل موجود بس مو تصور بنوكيا 🙁

  10. العزوبي عادي يحجز 🙁

    لانه صراحة دخل خاطري ..

    شكلة يفتح النفس ..

    وااااو 🙂

    وسعره مناسب

  11. ما شاءالله خوش تقرير

    واااايد حلو البوفية شكلة يشوق

    وحلوة اسعارهم والله

  12. مش معقووووووول ايه الجمال والحلاوة دى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *