احتساب المكالمات بالثانيه = الحجي ببلاش

.

.

مشكلتي ريال قانوني 🙂

الخبر يقول ان احتساب المكالمات بالثانيه راح يكون اعتبارا من 1 سبتمبر ! ( هنا الخبر )

وعلى هالأساس اتصلت على زين قبل شوي الساعه 8 ونص صباحا

.

رصيدك الحالي هو : 17 دينار .

شال السماعه الاخ الكريم نواف من شركة زين .

نواف : معاك اخوك نواف تفضل .

أبوفلان : صباح الخير أخوي نواف .

نواف : صباح النور أخوي تفضل .

أبوفلان : أخوي بالنسبة لقرار احتساب المكالمات بالثانيه طبقتوه ولا لي الحين ؟

نواف : والله يا أخوي لي الحين ماوصلنا تعميم بهالشي !

أبوفلان : متى بتطبقونه ماياكم خبر من الشركة ؟

نواف : والله يا أخوي على ماقريته بالجرايد على إنه بعد العيد إن شاء الله << ما ادري كأني سمعته قال بالعيد 🙂

.

المهم إن كلام البصيري الوزير المحترم طلع بيع برّد

ماكو شي اسمه تجار يطبقون القانون بوقته لازم لف ودوران

.

19 تعليقات

  1. عندنا يحسبونها بالثانية !

    معقول عندكم بالدقيقة ؟

  2. بيع البرد مو شي يديد على الحكومة ..

    عندك استاد جابر .. ذاب البرد وتيمد من الشمس .. ولين الحين بعد شهر ، بعد موسم ..

    هذا شي يسمونه تصريح اخرطي ، ” بسنا خرابيييط ، بسنا خرابييييط ” ..

    المفروض يحاسبون اي مسؤول على تصريحاته وقراراته .. مو بس اطلع ناهق وبس .. لا حسيب ولا رقيب .

  3. حكومة مييييييييييين و الناس نايميين

    على قولة أحمد السقا في فلم الجزيره ” النهارده ما فييش حكووومه أنييييييي الحكوومه أنيي الحكوووومه ”

    :p

  4. ناصر الكويت

    عمرك سمعت اخونجي يطبق كلامه … مايصير

  5. تصريح البصيري نفس تصريح الشمالي بخصوص الرواتب نفس تصريح فاضل صفر بخصوص خطة التنمية، يا أخوي ترى مو صعبة شغلة الوزير. 🙂

  6. اهما لو يطبقون قرار ملكية الخط …احنا بخير
    ولا نبي منهم شيىء اكثر ….!!!!

    • لا والله نبي ملكية الخط والحساب بالثواني ويرخصون المكالمات الدولية

      مخلين الكويت مركز لتجميع البيزات وعروضهم كلها بره الكويت من احلى مايكون

      خاصة زين

      وعندنا اهني يشفطون شفط

      كافي السنين الي باقوا فيها الشعب وهم يسحبون من الرصيد اذا اتصل عليك البيت

  7. لا وازيدك من الشعر بيت !!
    المكالمات بتصير اصفى <<< شكو !!
    ياعمي الديرة ديرة تجار وكلنا معترفين بهالشي ، وهذول ماتاخذ حقك منهم ألا بالقانون ( اذا كنت على حق ) ولا التعاميم الي يطلقها البصيري وغيره ماخوذ خيرها
    خله يصير قانون وذيك الساع في امهم خير مايطبقونه !!
    التعميم غير القانون ، مثل ماحصل مع سالفة البنوك والقروض ، كل السالفة ان البنك المركزي منزل تعاميم ( وليس ) قانون علشان جذي اللعب صاير شيء مو طبيعي وماهم قادرين يحلون المشكلة
    وبالنهاية الله لا يبارك ببلاع البيزة وعساهم مايحدرونها ويصرفون الفلوس على علاجهم ومايقومون من السرير
    اللهم آمين

    • اي والله التصاريح ببلاش والقوانين هي الي تتطبق مو التصاريح صدقت بوناصر

      الحين يقولوك شركات الاتصالات يقولون مانقدر نطبق هالشي الا بعد سنة اشدعوه عليييك

  8. من صجك الشركات تسمع كلام الوزارة !
    ديرة معكوسة يبا
    الوزارة تسمع كلام الشركات 🙂

  9. ومثل ما قلت لازم اللف والدوران !!

    الله كريم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.