مطعم قيصر سيزر .. Caesars


يقولون الواحد اذا مافيه ضغط وسكر وعليه أقساط مايصير كويتي !!

وأنا أقول الي مايعرف مطعم قيصر مو كويتي 🙂

المطعم معروف ومشهور

مطعم قيصر : مطعم يقدم الأطباق الهنديه والصينيه وايضا الايرانيه بس التخصص الأصلي هو الأكل الهندي ..

المطعم موجود بعدة مناطق : الفحيحيل وهو أسوأهم , وحولي بارك بنظري أفضلهم , والسالميه كله زحمه , والفروانيه على ما أعتقد ..


أول شي طلبنا المقبلات

شوربة دجاج بالذرة

Picture 421


طبعا مع الليمون والجراقي تطلع مضبوطه


عاد شنو الجراقي .. هذا هو

Picture 416


وعشان يكمل الجو تطلب معاهم خبز نان بالجبن والزبده ..

Picture 422


الطبق الثاني فتوووش ..

Picture 413


وعندهم سلطة جربتها مره قمت اطلبها كل مره .. 🙂

سلطة الربيان بالأناناس .. أياباااااااه

Picture 418


وهذا بعد ربيان على الطريقة التايلنديه خطير الصراحه ..

Picture 424

طبعا صورته متأخر ولا الكميه اكثر من جذي ..


وبعدين بدينا بالأطباق الرئيسية

أكثر شي يشتهر فيه المطعم والي الناس تطلبه هو : ستيك قيصر ..

الي هو هذا

Picture 412


طبعا يختلف الستيك بالمطاعم الهنديه عن المطاعم الأمريكية إختلاف كلي من حيث طريقة الطبخ والتتبيله والحجم والطراوة ..


والطبق الثاني هو : ستيك مكعبات .. ستيك مقطع بحجم التكه

Picture 414


,

أخوكم أبوفلان من عشاق هذا المطعم ولكن الحق يقال !!

مايعيب المطعم هو الرائحه , بما أن المطعم يقدم الأكل على أطباق ساخنه يسمونها ” التش تش ” يعني يجيبلك الطبق والبخار يطلع منه بشكل كثيف فالجو بالمطعم كله ريحة اكل

يعني ملابسك كلها تصبغ ريحتها وهالشي راح تحس فيه لما تطلع من المطعم وتروح البيت تقط ملابسك ..


التقــييم

المكان 10/8

كبير ووسيع وفيه كباين ..

جودة الأكل 10/8

السعر 10/10

الخدمة 10/8


والسلام مسك الختام ..

18 تعليقات

  1. يالله عليك ذوووق بالمطاعم صاروخي ! والله المطعم قوي وما يمر شهر وما اخذ لي بالقليل فتله عليه ! صراحه خووووش مطعم

    لاكن يعيبه شي واحد ان الي يسجل الطلب منك هندي يعني سبوع ولا سبوعين على ما يفهم شنو تبي تطلب !

    بس ترى لاحظت بدليه بالموضوع ! مادري بدليه او لأ

    ” وعشان يكمل الجو تطلب معاهم خبز نان بالجبن والزبده .. ”

    انا الي اعرفه ان النان اهو الخبر بس بالهندي والايراني !

    يعني جملتك معناها ” تطلب خبر خبر بالجبن والزبده ”

    يلا هارد لك ! ثاني بدليه اصيدها عندك 😛

    وبالعافيه مع انها شوي متأخره 🙂

    تشااااااااوؤ

    • ياهلا ومرحبا اخوي عجييييب

      العجييييب انك تقول اروحله كل شهر بس المفروض تكون حافظ المنيو نفسي !!

      لأن الخبز هم كاتبينه ” خبز نان بالجبن والزبده ”

      يعني مايصير انا اترجم المنيو بعد ..

      عاد الموضوع كان فيه بدليه لو صايدها انت چان مصكر المدونه انا هههههه

      لازم تغير اسمك الى ” فريق إزالة البدليات “

  2. هههههههههههههههههههه

    يعني مقابل الحجه بالحجه ( بضم الحاء ) امممم ماشي خلني ارد

    صحيح انا اروح له كل شهر بس لو يوصلك اسم طبق لو فكرت تقراه تحتاج كاتلوج اهني في كلام ثاني 🙂 وخاصه ان المطعم هندي ومخلط على جم شغله مو صح حجي !

    وما شاء الله دام حفظك قوي خلاص انا اتنازل عن ( اعتقادي ) واقول انت الي صح ولا تزعل وسامحني لليوم متأثر باسابرولجينا والفيكوزانثين والفيكوايرثرين والبرونويد والفيرزام وضبانول الاستيل ! وطحلب السيبروجيرا ! >>>>> لاتقولي شنو هذول ! كلهم بكتب الكيميا والاحياء 🙂 يعني مافي مجال احفظ قائمة الطلبات

    وعن ازاله البدليات لاتشوفني بالمسنجر ! بدلياتي تقول ايراني صار له يومين بالديره 🙂

    واسف على الاطاله بس ما احب اخلي شي بقلبي او مثل ما يقولون ابي ردي ما يخر الماي 🙂

    ونترقب المويضيع الياي او المطعم الياي 🙂

    تشاااااااااااااؤو

    • اووووه عاد الماسنجر لو الحكومه تسوي عليه رقابه نص جناسي الكويتيين مسحوبه هههه

      وان شاء الله راح تشوف الي يسر خاطرك ويحرك مشاعر كرشتك بس الميزانيه بتنضرب ضرب

      بشوفلي تاجر يحب المطاعم يدعم المدونه عشان لاتوقف <<< اشفيه شركة قوقل

      وحياك يالحبيب عجيب والله عجيب

  3. تسلم حبيبي على المراجعة الطيبة، لكن لولا اختلاف الاذواق لبارت السلع، انا المطعم ما عجبني، أشوف انه مطعم عادي وأكله مقبول، ما هو الشي اللي يخليك تتحمس ترجع له مرة ثانية..
    ولي ملاحظة على التقييم يعني ترى صعب انك تعطي الشي 10/10
    وبالاخير لي عتب بسيط على المطعم.. ان الفتوش الطماط فيها مو سقير سقير هههههههههههه 😀

    • هههههههههههههه

      ايه نسيت اقوله سقير سقير ههههههههههههههههه

      انا اشوف انه في وايد اشياء تشجعني

      منها يكون عندك ربع بالمطعم هههههههههه

      يعني باجر بتروح الهند تلقالك ربع

  4. مطعم جميل وأكثر من رائع ..

    ويا ريت تكتب بنهاية الموضوع لاحد يرز وجه ويقول أنا عاجبني ومو عاجبني ..
    أنا ما أقصد أحد .. هههههههه

    بعد لو تحط إحداثية المطعم بالإيرث قوقل شي جميل ..

  5. اعتقد المدونه يبيلها برنامج رجيم لأنها بدت تظر عليها بوادر السمنه والشحوم زايده من كثر مواضيع البلعه

  6. منو مايعرف قيصر ؟
    فعلا ممتاز واكله لذيييييييييذ جدا ، بس اعجبني وصفك ( تش تش ) 🙂
    بالعافية بو عزوز

  7. ممم شكل الاكل يشوق.. عاد انا عمري ما طبيته
    يعطيك العافيه على هالتقارير

  8. هذا المطعم المفضل عندي

    صدقني احلى استييك اكله عندهم

    ما اتوقع فيي احلى منه

    واحلى شي لمن اييبلك ايااه يقوول تشتشتشتش (اكلني بلغت الستيكات 😛 )

    ويكوون حدااا ذااايب عكس المطاعم الامريكيه معااناات عشاان تقص الستييك

    وقبل كان عنده دياي تندوري بس شالووه من المنيوو

    كان احلى شي

  9. جم سعر الكبينة؟؟ وتشمل الطلبات ولا الطلبات لهم سعر ثاني؟؟ شكرا:)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.