تجربة مطعم ملاس بوخماس للمأكولات الكويتية

 

 

مطعم جديد في منطقة العقيلة للمأكولات الكويتية في مجمع طيبه مول خلف مجمع البيرق

هذا المطعم كان عبارة عن مطبخ للطلبات الخارجية في المهبوله لكنه افتتح اول فرع له في العقيلة للأكل داخل المطعم مع زيادة الاصناف والأسعار

 

 

الأصناف التي يقدمها المطعم كثيره جدا كأكل كويتي بجميع انواعه اللحم ( استرالي ) مجبوس وبرياني ومرق ، والدجاج ( ساديا ) برياني ومجبوس ومرق

ايضا السمك والربيان والبلاليط والدجاج المحشي والمموش وغيره من مأكولات كويتية

مايعجبني في المطعم هو توفير كبائن كبيرة لمن يحب الخصوصية ، وجلسات ارضيه للشباب الي يحبون الضرب بالخمس 🙂

ومكانه كبير جدا جدا جدا

 

 

 

الشوربة ممتازة والفتوش ايضا ممتاز

الطبخ كان ايضا رائع كمية الدهن في العيش جيدة مو نفس فريج صويلح العيش كله دهن

كمية الأكل كثيره وكافيه والدجاج المستخدم من افضل الانواع وهو ساديا اما اللحم فهو استرالي وكان طبخه ممتاز واللحم ترف

 

 

مشكلة المطعم في أسعاره المرتفعه بالنسبة لغيره من المطاعم التي تقدم نفس الاصناف والمستوى تقريبا

 

 

التقييــــــــــم

 

المكان 10/9

الخدمة  10/8

جودة الأكل 10/8.5

السعر 10/7

 

 

13 تعليقات

  1. غلطان الحبيب جان حط مجبوس الدجاج ب 5 دنانير !!!

  2. بالهناء والعااافيه ابو فلان

    بس عاد تبغى الصدق … والله اني اشتقت لمواضيعك عن لوفات

    لك اكثر من شهرين ماحطيت موضوع عنهااا .. تراني متحدي معااااك لا تكون نااااسي بس

    • الله يعافيك طال عمرك

      والله للأسف اخترب الرجيم بعد ثالث اسبوع م لوفات رحت شاليه ورديت وسافرت للعمره وصارت عشيات وعزايم الله لايوريك 🙂

      آخر وزين وصلتله 95.6 كيلو كنت قبل 105.7 نزلت عشره كيلو خلال شهرين ونص

      ناوي بعد سفرة الصيف ارجع مره ثانيه للتخفيف والله يعيننا في رمضان

      • ماعليك ابو فلان وسع صدرك قبل خوض المعركة الكبرى

        وزي مايقولوا استراحة محارب

        بس ابقولك وزني عشان ادب الحماس والاصرار فيك

        كنت 147 والان 131 وياتلحق القطار ولا راح يفووتك:)

  3. عوافي يابوفلان

    شكله خوش مطعم وشكرا للتقرير

  4. عوافي مطرح مايسري يمري

    شكله خوش مطعم يبيله زياره

    تسلم على التقرير

    • الله يعافيك

      انصحك فيه صراحه وبعد الأكل فيه كراسي وقهوه ولقيمات وشاي 🙂

      الله يسلمك

  5. السلام عليكم وين الرجيم

  6. ياخي كرهت المدونه , ماتحط مواضيع مثل هذي الا اذا كان حاكني الجوع !! 🙂 شكلي ثاني مره ماراح ادخل الا اذا متعشي

  7. بوفلان هالصفحه مالتك كلها مطاعم وأكل …
    قريت مواضيع هالصفحه طلعتلي كرش اكبر سيخ وهذا موضوع السوشي والحين هالموضوع لووول .. خلاص كرشت من هالصفحه

  8. عافية بو فلان بس الصراحة صارت المطاعم ناااااااااااااااار وشرار اشدعوة كلا حشوة بطن الله يهديهم المفروض البلدية اتحد من الاسعار بس الشكوى لله

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.