تجربة ” مطعم تاج ” للمأكولات الكويتية

 

 

في الشاليه قبل يومين قمت والربع بتجربة مطعم تاج للمأكولات الكويتية في منطقة الفنطاس

المطعم بادارة الشيف عبدالله المكيمي وشغله مرتب من ناحية الترتيب والنظافة والعلب المستخدمة

ويقدم العديد من المأكولات من البرياني الذي يقدمه بثلاث انواع الى المجابيس والربيان والمربين والسمك

 

 

الطلب كان عبارة عن صينيتن كل صينية فيها ثلاث صحون

الصينية الأولى عيش وربيان ( مربين  ) مع الدقوس والخضره والأجار والمعبوج كان طيب للغاية

لكن بعض قطع الربيان كانت يابسه شوي

 

 

الصينية الثانية مجبوس دياي جيد جدا مع الحشو طبعا

 

 

 

كمية الأكل مناسبة وتزيد ايضا عن الحاجة

بالنسبة لسعر الطلب كان 18 د.ك بدون مشروبات

وقت وصول الطلب من الفنطاس الى منطقة ميناء عبدالله استغرق ساعة ووصل الطلب حار وممتاز

 

رقم المطعم : 1800002

 

 

17 تعليق

  1. بالعافيه بالعافيه زين على الاقل يوم بالاسبوع تكسر روتين الرجيم
    عشان لا تزهق و تعمل رده فعل للمعده اذا وزنك ثابت يسمون هالعمليه
    الشوك او الصدمه عشان يرد ينزل وزنك اذا كان مو راضي ينزل 🙂

    تعال شخبار الرجيم وياك و شكثر باجي علما يخلص و هل ناوي تجدد
    او تغير الشركه او لا ؟؟

  2. سعد الصليلي

    اول شي بالعافيه عليكم …

    ثاني شي << مو جنك مسوي رجيم

    • الله يعافيك

      بعد لازم يوم واحد فري 🙂 وشاليه لازم الواحد يتغذا عدل

  3. عبدالهادي

    اااخ بس.
    الله يهديك انا مغترب وانت حاط هالصوره بطني قعد يقرصني.
    باين عليه شغل نظيف. شكلي برد الكويت جربه.

    • انا آسف 🙂

      الله يعينكم فعلا المغترب يشتاق لكل شيء في ديرته وخاصة الأكل

  4. بالعاافية ان شالله والله توني ادري ان فيه مثل هالمطعم عندنا انا كله اطلب من ملاس بوخماس وبيت دكسون خوش مطاعم اكل بيت بس زين دريت عن تاج ماشالله باين انه نظيف واكل بيت من الصور يشهي شلون لو جدامنا لووووووووول راح *_^

    • ملاس اخترب للأسف مو نفس قبل

      هذا الى الآن ماشاء الله جيد حسب تجربتي له

  5. الظاهر خربت الرجيم بوفلان ..بالعافية :))

  6. المطعم مجربه وخوش مطعم واكله لذيذ وكميه الوجبه تكفي شخصين من وجهه نظري ..
    في ملاحظه عالمطعم
    انا اطلب منه وانا بالدوام خاص دوامي بشعيبه فكان دايم ينقص الطلب وندفع حسابه ويقول باجر اذا طلبتوا انقصه من الحساب .. حسيت انه يستغلنا بالطريقه وماقمنا نطلب منه

    • عيل اكيد شغل الهبه اللي صايره بانستاقرام و مو مرخص…شلون يخلونهم يشتغلون جذي البلديه!!!

      • المطعم مرخص ولانه في منطقة جديدة عمارات والى الآن ماتم تمديد الخطوط لهم

  7. الحين ودي اعرف هذا مطعم بترخيص تجاري والا شغل بيت . . و اذا مطعم اهو ليش ماعنده رقم ارضي واعلان بالجرايد…هل اهو نظام انستاقرام؟؟؟؟
    الحين لمن البلديه تصيد بالمطاعم المشهوره اوكي… بسهذا اذا ماكان مطعم صجي و شغل انستاقرام…شلون نعرف اكله شنو و نظافته شلون…b+F طلعوا عنه حجي والناس قالت ان اكله نظيف….فهموني

  8. حتلا قعده جنه ماكو

  9. زبائننا الكرام ابلغكم بأنه الرقم قد تغير الى 1800002

  10. والرقم القديم قد التغاء وهذا رقم البداله

  11. موفقين خير وان شاء الله راح اطلب منكم الجمعه الجايه وان شاء الله تكونون قد السمعه الي نسمعها عنكم وراح اتصل علي رقم البداله

  12. ارجو ما احد يتصل بها الرقم 55111402 لانو لم يعد خاص بها المطعم وشكرا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *