تجربة مطعم Del’etoile الفرنسي 2

 

 

مطعم Del’etoile فرنسي مكانه في الأفنيوز مقابل بنك بيري

اختيارات المنيو اعتبرها قليله لا يوجد فيها تنويع

 

بداية جلوسك يقدمونلك الخبز الفرنسي الي المفروض يكون حار مثل اول زيارة لي للمطعم لكن كان على العكس كان بارد ومعاه زبدة لذيذة

 

 

بدأنا بشوربة المشروم للمقبلات كانت حلوة لكنها مالحه

 

 

الطبق الثاني ربيان مع الأفوكادو ما انصح فيه ابدا الطبق مافيه طعم كأنك تاكل أكل رضيع ماتحس بأي طعم ابدا

 

 

الثالث كبدة البط من أجمل أطباق المقبلات الي تذوقتها في المطاعم ترفه جدا ودسمه وتذوب في الفم 🙂

 

 

الطبق الرابع عبارة عن ربيان بالبقصمات ايضا لا انصح فيه وان كان شكله يغري الا انه كان دسم جدا ومليء بالدهن وطعمه عادي

 

 

الأطباق الرئيسية كانت عبارة عن ثلاث اطباق ستيك اثنين منهم من نوع ريب آي ستيك ، طري وطبخ الستيك كان ممتاز بطريقة well Done

أما الثالث ستيك فيليه كان شوي ناشف

الستيك كله يقدم مع صلصة من اختيارك وطبق بطاط مقلي

 

 

التقـــــييم

الخدمة  8 / 10

جودة الأكل 7 / 10

المكان 8 / 10

* المطعم كانت مساحته أكبر من الآن لكنه ازال نصفها وافتتحوا بجانبه مطعم آخر

السعر 8 / 10

 

 

.

 

16 تعليق

  1. مو جنه سعره وايد غالي … شدعوه ستيك لحم 220 جرام اب 8 دنانير !!!

    • سعره بالنسبة للمطاعم الفرنسية الثانيه يعتبر زين اما الأمريكية طبعا ارخص وتختلف جودة قطعة الستيك الي يقدمها

  2. as3ara wayid mbalegh feeha

  3. بندر الحربي

    بيبسي قوطي بدينار !!!!!!!

    والله الكويتيين صيداات ، اهم شي انك يابوفلان حاط السعر ٨/١٠

    • كل المطاعم يتراوح سعر البيبسي فيها من ٩٥٠ فلس الى ١ ونص تقريبا

      سواء في الكويت او غيرها

    • مافي شي اسمه صيدات وكلام فاضي مع احترامي لك

      كل المطاعم تقدم البيبسي بسعر مرتفع تبيني اقتنع ان حضرتك ماتطلب بيبسي من مطاعم سريعه سعره ٦٥٠ فلس !! وهو سعره بالجمعيه ٩٠ فلس ؟!!

  4. ابو فلان السعر حيل مبالغ فيه …

    المطاعم صارت على الاسامي مو الطعم !!

    • السعر اقيمه بناء على مقارنته بغيره من المطاعم + مستوى الأكل والسعر أشوف ان اسعاره جيده وفيها بعض الغلاء

  5. بالعافيه ان شاء الله

    المطعم جربت فيه الريوق مثل ماكتبت عنه قبل مده ممتاز وخدمتهم زينه للأمانه وكمية الأكل ايضا افضل من غيرهم

    • صحيح كمية اكلهم ممتازه على غير عادة المطاعم الي يحطلك اكل كميته حق رضيع وتطلع مو شبعان 🙂

      الله يعافيك

  6. مطرح مايسري يمري 🙂

  7. عااااافيه بوفلان

    كما عهدناك تقرير مميز

  8. عافيه بوفلان
    تنصحني آكل من هالمطعم ؟
    ولا عندك غيره تفضله عليه من المطاعم الفرنسية ؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *