العطورات الفرنسية .. بين نارين

اليوم موضوعي عن العطورات الفرنسية

هالموضوع صج الي لي الحين مافهمته ..

كل مكان يقولك الزين عندي وهذا يقول عندي الأصلي والثاني يقولك لا هذا تعبئة الإمارات انا تعبئة من فرنسا

وخذ من هالحجي على أفا من يشيل !!

بالنسبة لي راح أقولكم اشمريت عليه من يوم ما بديت أشتري عطورات فرنسية

أول شي كنت أشتري من المحلات المعروفه ( دبنهامز – فافافوم – وجوه – بيضون ….. إلخ )

العطورات صلخة ويه والكثير منها خاصه الرجالي مايطوّل ع الملابس

وبعدين قالولي روح سوق السلاح ارخص من هالمحلات وفعلا غيرنا الوجهه إلى سوق السلاح

بالنسبة لسوق السلاح أرخص من هالمحلات ب 4 إلى 5 دنانير أو أقل وعنده العلب التيست الي هي بدون غطا ولا كرتون مجيس

والعطورات نفس الريحه ونفس الأداء يعني العطر الي شريته من دبنهامز والي شريته من سوق السلاح اهو نفسه ماكو فرق لا بالريحه ولا بطول مدته على الملابس

ومن بعد ما حولت على سوق السلاح إطلعت سالفه يديده !!

إنه عطوراتهم إخرطي تعبئة الإمارات والأصلي يكون تعبئة البحرين ..

لما تسأل الي بسوق السلاح يقولك احنا نورد حق المحلات والي بالمحلات يقولون احنا وكلاء نييب من المصدر !!

يعني كأنك داخل نفق وتييك ثلاث مخارج وكل مخرج فيه مخرجين وهالمخرجين فيهم مخارج ثانيه وتبي تطلع تقعد تلف على روحك

المهم بعدين إطلعت سالفه تركيب العطورات والخمطه ب 5 دنانير هههههههه يعني يعطيك 8 عطورات 50 ملي ويقولك تركيز عالي أكثر من الأصلي وفواح ويطول تطلع عليك ب 5 دنانير

عاد انا قلت خل أجرب وأطلب عطر الشيخ أول رشه دمر الدشداشه وخليته بالسيارة تغير لونه قلت يامعود لايصيدونه تفتيش عبالهم بيك عرق !!

ومن بعدها ابتلشت ما أدري وين أروح ؟

آخرتها طحتلي على سرداب بصناعية العارضية يبيع أصلي بالكرتون ومجيس وأرخص من بره من 4 دنانير إلى 20 دينار ..

وهاذي بعض البضاعه الي شريتها منه تقريبا ب 260 دينار شريت منها هدايا ومنها استخدام شخصي


Picture 071


Picture 080


طبعا عنده مكياج ع الخفيف

وكريمات ومزيلات عرق وسوالف ثانيه بس أكثر شي العطورات

ومكانه كبير وراهي حيييل ورخييييص

أنا الصراحه إقتنعت فيه وماقمت أشتري إلا منه

مكانه للي يبي يروحله : الدائري الخامس تاخذ إشارة الجسر الي عند الأفنيوز يسار وبعدين أول لفه يمين وبعدين اييك تقاطع تاخذه يسار وبعدين أول لفه يمين يصير على يسارك ..

مكتوب عليه لوحه ” معرض البدور للعطورات “

أخذت منه عطر ” كريد ” الأبيض

02978720405


أخذته ب 25 دينار ..

وهو ينباع عند المحلات ب 45 او أربعين ..

يعني فرق 20 دينار

وباللحظات الأخيره الي الإنسان يقرر فيها إنه يصفي على شي ويثبت عليه

يطلعلك إعلان واحد بالانترنت يعطيك 18 عطر بجياسها وعلى قولته أصليه وبكرتونتها ب 8 دنانير ههههههههه والله من بعدها انا صكني اليأس ..

وبعدها خلاااااااااص قلت إثبت على شغلك لا يطلعلك واحد يبيعلك الخلطه السريه مالت كل عطر بدينار ..


إلي عنده فايده يفيدنا او مشاركه عن احسن مكان يدلي بدلوه ..


ولنا عوده نذكر فيها أجمل العطورات الرجاليه والنسائية


ودمتم

24 تعليق

  1. أما سالفة يسير عرق … ههههههههه

    بعدين وين يا خوك ما شفنا الهدايا ..

  2. عاد انا ادمان عطورات فرنسيه

    حتى خربت ريلي وياي خخخخخ

    يعطيك العافيه

  3. دوخت نفسك على الفاضي

    خلك على فافاوووم ودبنهامز ابركلك

    • هلا أختي ميلانيه

      الحياة تجارب وأنا من النوع إلي مايحب الواحد ينصب عليه عشان مالي خلق أدور ومالي خلق أروح

      البضاعه هي هي في دبنهامز وفي سرداب العارضيه

      ليش أروح للغالي وأترك الأرخص !!

  4. والله ما قلت لنا عن هالسرداب ليش يا خوي؟
    والله من زمان مو شاري عطورات اللي عندي ليلحين ما خلصوا ، موضوعك حمسني أروح أشتري ، بس ألحين بيدخل الشتا ما يمدي …. :/

  5. والله لك خلق تفتر وتلف بالديرة !
    انا زين مني اطلع مشوار بسبة الزحمة ، بس معلومات حلوة الي حطيتها لنا
    عاد العطور غرام الأهل ، كل فترة عطرين الى ثلاث ( ويحوشني ) نصيب لوووول
    عساك على القوة

    والحين عرفت ليش مدونتك ( ريحتها حلوة ) !!

    تحياتي

  6. البدور للعطور يقول انه يوزع على المحلات وانا صارلي 6 شهور اخذ منه عطوور صح كلامك ارخص وايد وبكراتينهم .. من خلال خبرتي معاهم ولا عطر شريته منهم طلع بدلية كل العطور اصلية وانصحكم فيه .. بس في واحد بالوسيط يبيع العطر اقل ب 75% بالضبط في عطر شفته ب 30 وعند البدور ب 20 بس عند الريال بالوسيط ب 10 !!! والعطر نفسه مره اتصلت عليه وياني البيت وجربت عطوره ونزلت عطوري الاصلية عشان اختبر العطور اللي عنده طلعت نفسها بالضبط فتركت البدور والحين اتعامل مع الريال اللي كل شهر اخذ منه مجموعه بس اللي عنده بدون كرتون وساعات الزجاجة تقول مزلقة بس المضمون اصلي وانت اول وتالي بتحذفها بالزباله عزكم الله والكرتون مالك حاجة فيه في يكون الافضل هذا واللي يبيه يقولي اعطيه رقمة ويجرب بنفسه … ولكم جزيل الشكر ويا بوفلان مودنتك يازتلي والى الامام دائما

    • يعطيك العافيه بوصالح ع المشاركة المفيده

      بس في كذا منتدى خاصة الي فيهم قسم خاص للبيع والشرا في أكثر من شخص يقولك ييب غرشة العطر القديمه اعبيلك اياها نفس العطر الأصلي

      يمكن هذا سبب من اسباب كون الغرشه شوي تييك مخدشه

      وانا ما استبعد انه يكون نفس الي يبيعونه بالمحلات كل شي جايز هالزمن

      اذا رقمه موجود حطه لعل الله يكتب له الرزق عن طريق هالمدونة المتواضعه ويدزلنا غرشة ببلاش 🙂

      دمت بحفظ الله

  7. صورو محل البدور هذا
    ودي امرهم اشوف عطوراتهم

    انا نصحوني بشغلتين فقط
    قال تبي عطر اصلي مو تعبئة الامارات ومو مغشوش
    عندك 2
    دبنهامز ولا المطار المغادرون
    اشتر من هناااك وريحته اصلية

    انا كنت اشتري من فيسز ( وجوه ) نصابين نشممني عطر غير الي انا طلبته !!
    طلبت منها مره عطر ديزل ( الموضفه ) التستر ريحته حلوه وقويه والي شريته انا خرطي النصب واضح ووجوه مغشوش

    ياريت لو تدلوني على مكانه هالمحل وبالصور وبشكل ادق شوي
    وهل يوصلون للمنازل ؟
    واذا ييت اشتري منهم بالجمله ولا بالمفرد ؟
    وبس هذا الي كان عندي ويعطيك الف عافية على هالمقالة الحلوه

  8. السلام عليكم ورحمه الله وبركاته .. البـدور ارخص من المحلات الثانية مثل دبنهامز وفسيز .. إلخ .. بس قلت خلني اروح عطورات البدور بالعارضيه واشوف اسعارهم ونفس النوع وريحت العطر ماتروح بسرعه . ورحت لهم ولقييت اسعارهم ارخصص من باقي المحلات وانا صارلي 4 شهور وكل اشتري منهم لانه كل عطوراتهم اصليات ولا عندهم مغشوش وهالخرابيط .. ودمتم بود

  9. السلام عليكم

    شباب حبيت اشارك برأيي بخصوص العطور الي من مخزن العارضيه للامانه التركيز والثبات معدوم في اغلب العطور الي شريته يعني كان الافضل ديور سبورت وقوتشي سبورت وموذاك الزود يعني بصراحه اي شي والريحه كلش مو مركزه ولا قويه ولاحتى تقول العطر بارد كلها ربع ساعه وجنك ماسويت شي انا غلطت غلطه ورحت شريت منهم 6 عطور قلت مره وحده افتك وبالاخير للاسف راحو هداني كل واحد من الربع اقط عليه عطر لانه بصراحه تافهه من اول ماتجربه
    هذا وجهة نظري وهي نصيحه اذا بتجرب اخذ عطر وقارن مع الاصلي صدقني بتشوف الفرق وخاصه بالعطور اتعب على الاصلي لان التقليد تتغير ريحته وثباته شبه معدوم والله على ماقول شهيد

    والسلام مسك الختام

  10. السلام عليكم
    حبيبت أشارك معاكم بالموضوع معرض البدور والله والله شاهد على كلامي ((((أسعارهم أغلي من السوق اليوم أنا شفت الفرق ولا بعد صاحب المحل يمني وجنسية أماراتي يمكن العطور كلها تعبئة الأمارات أرجو الأنتباه

  11. محمد ابراهيم

    اخي الكريم ابو فلان
    من خلال تجربة لهذا المعرض هل عطورة اصلية ؟
    واذا امكن ممكن عنوانه؟
    ولك جزيل الشكر

    • انا اشوفها اصليه من خلال تجربتي لكل محلات العطورات وتقريبا نفس العطورات تم شراؤها كلها نفس الريحة والثبات

      البعض يقول انها تعبأة الإمارات وانها غير اصليه

      العنوان موجود في اكثر من موضوع

  12. محمد ابراهيم

    شكرا جزيلا علي الرد

  13. يا جماعة ..اانا يت البدور للعطور وجدت عنده عطور الواضح لي انها اصلية 100% لكن الموظف رفض ان اجرب العطر … بعض العطور عندهم رخيمص بما بما يقارب 5 أو 4 دنانير … لكن كثير اقول ( كثيـــرررر ) من العطور عندهم اغلي من المحلات / مثل ذلك عطر ( ون مليون ) 100 ميلي سعره عندهم 18 دينار اما المحلات افي سوق السلاح 17 دينار بنفس الودة وبالكرتون .. وعطر 0 فنتازي سعره في العارضية الصناعية 8 دنانير – وفي سوق السلاح 7 دنانير على العموم انا مطلع وعندي خبرة …أما مكان البدور للعطور في صناعية العارضية:( عندي تدخل العارضية الصناعية فتكون وزارة الداخلية والبنزين على اليمين وشركة الخرافي على يسارك …والشركات امامك وامامك خيارين اما يمين او يسار فتاخذ يسار … ثم اول دخلة يمين وتسير مسافة 50 متر وانظر على يسارك تى المحل بالسرداب مفتوح على العموم هذ رقم هاتفي 9977373

  14. السلام عليكم
    حبيت اشارك معاكم ولو ان الموضوع قديم لكن ممكن رأيي يكون صح

    اولا بخصوص سوق السلاح اللي اعرفه عنهم انهم يشترون من بيضون والخطيب بسعر الجمله هذا على كلام البياعيين بالمحلات عندهم والله اعلم

    ثانيا هل العطر اصلي او تقليد هذا شي ما يهمني اذا كانت نفس الريحه ونفس درجة الثبات وفرق السعر كبير

    ثالثا من وجهة نظري المتواضعه بقيم الشغلتين يعني نتكلم عن دبنهامز نلقاه محلاته كبيره وبمجمعات كبيره طبعا اكيد اجاره راح يكون غالي وغير جذي معاشات الموظفين عنده اتيي تقيسها على محل بسوق السلاح
    راح تلقى فرق كبير هذا اجاره اقل طبعا وعنده هندي ولا اثنين معاشاتهم ما تيي 100 دينار عشان جذي دبنهامز ولا غيره راح يبيع السلعه غالي يبي
    يغطي اجاراته ومعاشات موظفينه لكن شوف اذا سوى خصم تلقى العطر اللي كان ب 30 صار 25 او اقل

    اما بخصوص العطور اللي كتب عنها بوصالح اللي طايحين فيها هالايام يقولك تستر بدون كرتون هذا كلام فاضي هذيله نصابين لو تلاحظ الغرشه مزلغه وشكلها مستعمل وملعون خيرها ليش !!! لانها من الاساس مستعمله وفاضيه لكن يتم تعبئتها مره ثانيه عاد اهني هل يعبونها اصلي او تقليد الله اعلم
    هذا برأيي الشخصي ويحتمل الصواب او الخطأ
    والسلام خير ختام

  15. بدي اعرف عن مكان ببيع العطر ١٠٠او اقل نفس الاصلية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *