شرح طريقة طلب الآيفون4s من أبل ستور البريطاني

 

 

بعد رؤية الجشع الذي تمارسه بعض الشركات قررت عمل شرح بالصور والفيديو عن طريقة طلب الآيفون 4s من موقع Apple/uk الستور البريطاني لشركة أبل حتى لا يأكل التجار أموالنا بسبب جهل البعض

والطريقة بسيطه

ويجب أن تنتبه الى ضرورة وجود صندوق بريد مع أحد شركات الشحن حتى تستطيع الطلب

 

الخطوات :

* ادخل على هذا الرابط : Link ، ثم اتبع الشرح بالصور

 

 اضغط على الصور لتكبيرها

 

 

بعد الإنتهاء من عملية الشراء سيصلك بعد يوم او يومين ايميل بالموافقه على طلبك

 

 

أحيانا لا يصلك ايميل ، أو قد يذهب مع ايميلات السبام تستطيع متابعة طلبك من الموقع كما في الصوره وتعرف حالة الطلب هل تم الغاؤه أو تمت الموافقه عليه وكتابة تاريخ شحن الجهاز

 

 

ملاحظات :

* اذا كانت هذه أول مره لك للطلب من ستور أبل البريطاني فقد يتم طلب اثباتك عن طريق الايميل والأمر بسيط

قم بوضع الفيزا ، وبطاقتك المدنية او رخصة القيادة على ورقة بيضه وقم بتصويرهم بالآيفون او اي جهاز آخر كصوره عادية بشرط أن تكون واضحه وارسلها الى الايميل الذي تطلب منك أبل ارسال المعلومات اليه .

* اجعل في الفيزا مبلغ زائد عن المبلغ المكتوب في برامج صرف العملات لأنه حسبتك تختلف أحيانا عن حسبة الشركة أو البنك .

 

شرح الفيديو

 

httpv://www.youtube.com/watch?v=G7cBzHAHzPc

Link

 

53 تعليقات

  1. تعديل الزمر بسيط = الامر بسيط

  2. يعطيك العافية على الشرح الوافي و لكن كم يوم يحتاج يرسلونه من الستور الى الصندوق ببريطانيا

  3. مشكوووور ماقصرت كفيت ووفيت

  4. الله يعطيك العافية .. جهودك جبارة يابو فلان

  5. الله يعطيك العافية
    شرح وافي وكافي
    سؤالي عند الخطوة 4 لما يطلب مني الدخول بحساب الاب ستور
    وطبعا انا مسجل بالستور الامريكي وباسم غير اسمي وعنوان امريكي فهل يؤثر هذا على طلبي او ادخل من الخيار اللي على اليمين كضيف

    والسؤال الثاني الظاهر عندي ان رقم الهاتف مختلف وهو كالتالي 01753210399
    فهل له تأثير وشاكر ومقدر لك اخي الغالي

    • يعافيك ربي

      مافي مشكلة الطلب عن طريق الموقع منفصل عن الآب ستور الأكاونت الي طلبت منه انا عنوانه الكويت في الآب ستور واطلب منه بعنوان بريطاني من موقعهم هذا

      الرقم حسب الموجود في تعليمات الصندوق عندك اكتبه نفس ماهو مافي مشكلة

  6. السلام عليكم
    انا طلبت الجهاز يوم الخميس ١٤ اكتوبر . ومع هذا سيتم شحن الجهاز بتاريخ ٢٠ الى ٢٧ . ليش ؟
    بعدين طلع علي جهازين ب ٤٤٤ دك . يعني الجهاز الواحد ٢٢٢ دك . هم ليش ؟
    على بنك الخليج .

    • طلبته متأخر انا طلبت جهاز بعد ساعتين من فتح باب البيع بيوم 7 اكتوبر والشحن نفس وقتك 🙂

      أحيانا البنوك تاخذ زيادة بسبب سعر الصرف وتغيره ولهم طريقة غريبه في حسبة العملات

    • السؤال: متى ستتحرك شركات الاتصالات و توفر الجهاز مثل الايفون 4! لازم أبل تبدأ بخدمة الدول اللي فيها جشع مثل الكويت

    • اريد أيفاون 5 أرجوكم

  7. سعطسك العافيه بوفلان بصراحه شرح ممتاز ووافي
    بس عندي سؤال..يصير اطلب وانا ماعنده صندوق ارامكس
    يعني عادي اكتب عنواني بالكويت ويوصل ؟

  8. كفو والله بوفلان صراحه عمل كبير وتشكر عليه و وفرت على الناس فلوس وايد والله يجزاك خير

  9. يعطيك العافيه يا بو فلان ،،،

    الصراحه ،، قاعدلهم قعده ،، بس انتبه لا يغتالونك ،، ترا يسوونها ،،،

    بس سؤال بسيط ،، كم تكلفة الشحن ،، يعني بالعربي التوتل كم ،، الايفون والشحن ،،،

    ما قصرت ،،،

  10. صراااااااااااحه يا بوفلان تحياتي

    السؤال كالاتي

    1 هل يفرق الجهاز البريطاني اللي بطلبه عن الجهاز اللي بالكويت ؟؟؟

    2 انت كاتب ان في ضرايب …. قيمة الضريبه راح تنحسب علي ولا ماتنحسب؟؟

    ومشكور يا مبدع

    • الله يسلمك

      الجهاز مايفرق عن الي عندنا

      والضريبه ياخذونها عليك وهذا العيب الوحيد عند الطلب من بريطانيا وهي الضرايب العاليه

  11. مشروطة تكون الفيزا أمريكية.؟
    غير هذا ضروري أدز لهم البطاقة والفيزا ؟ -.-

    • مو شرط الفيزا الامريكيه ، انتبه ان الشرح للستور البريطاني وليس الامريكي

      والاثبات اذا طلبوه منك ارسله لهم اذا ما اطلبوه لاترسل

  12. يعطيك العافية ، انا بالنرويج ورفيجي بيجي من أمريكا خلال أسبوع هل اقدر اشتريه من امريكا (طبعا مقفول على احدى الشركات ) وأفتحه بعدين بطريقة او اخرى ، اذا نطرتا ينزل هنيه راح تكون ضرايبه 38% يعني 16 جيج يطلع ب360 دينار تقريبا،
    يرجى الافادة

  13. انا طلبت iphone 4s من موقع handtec بريطانيا بتاريخ 8 اكتوبر وطلع علي 229 دينار مع الشحن ولكن قالولي إن الشحن خلال أول اسبوعين من نوفمبر ،،، يعني مطولين الجماعة..للعلم فقط

  14. السلام عليكم …

    اخووي لازم يكون عندي حساب بارامكس عشان اطلب ولا مو لازم ؟؟

    • اي نعم لازم يكون عندك صندوق بريد سواء مع اراميكس او DHL او غيرهم من شركات الشحن المعروفه

  15. يعطيك العافيه بوفلان كفيت ووفيت
    ماقصرت والله..ايه خل الناس تعرف تطلب من برا احسن لهم
    بيوصلهم قبل لايجي السوق وبسعر ارخص بعد
    انا دايما اطلب من بريطانيا احسن من اسعار السوق ترفع الضغط صراحه
    كانه مافي الا هم اللي تقدر تشتري منهم
    عالعموم انا طلبته اول دقايق من حدثوا الستور والحين توه طالع من ارامكس اليوم 🙂
    لو صاحي يوم الجمعه بدري كان لحقت ويكون جايك بالطريق اللحين ههههههههه
    مبروك لكل اللي طلبوه وعساكم تكسرونه بالعافيه 🙂

    • الله يعافيك ومبروك الجهاز

      المصيبه ان طلبي تم شحنه لكن الى الآن ماوصل صندوق اراميكس :/

  16. سلام عليكم يعطيك العافيه

    اخوى انا صارتلي مشكله بالموقع

    اول شي انا طلبت جهازين من الموقع (الحد المسموح فيه)على فيزتي وقبلوها

    وبعدين طلبت 6 اجهزه بفيز مختلفه ملوت ربعي بس بصنطوق

    حطيتهم كلهم بعنواني صندوق ارمكس

    انصدمت بعد يومين انه الاجهزه الي موبفيزتي تكنسلو والمبلغ للحين مسحوب ومادري شنو اسوى الحين ؟ في طريقه

    • عادي مرات يكنسلون اذا صار اشتباه نفس اليوزر والفيز مختلفة

      والمبلغ يرجعلك من ٧ الى ٢١ يوم بحسابك

      اثنين من الربع كنسلوا طلبتانهم الي طلبوها العصر ردوا اطلبوا بالليل وافقوا عليها

      ما ادري شنو ضابط الطلب

  17. الله يوفقك وين مارحت انشالله.

    هذا اقل شي اشكرك فيه و اسويه لك يابو فلان

    وانا من متابعينك يومياً

    انته وفرت علينا وايد وانا طلبت

    عن طريق تعليماتك ومشت اموري والله يعطيك الف عافيه

  18. السلام عليكم

    الله يعطيك العافيه بو فلان على الشرح

    كنت بسأل الحين الاستور الامريكي فتح الطلب على الأيفون بدون عقد مفتوح يعني وسعره ارخص من البريطاني بسأل يوصل للسعوديه لأان شركات الاتصالات عندنا اعلنت انه حايوصل السعوديه بعد شهرين وطبعا اكيد السعر نار وحجز وزحمه

  19. يعطيك العافيه يابوفلان على الشرح الوافي والمبسط

    ومن بعد اذنك
    نقلت الموضوع للمنتدى
    وذكرت فيه المصدر 🙂

  20. مشكور

    نزل الايفون ؟ انا اشوف بالاتصالات يبيعونه عندنا ب6000
    ريال . سرااااقين

    ونزل له جلبريك ؟

    ارجو الرد باسرع وقت

  21. ابو فلان طلبت منهم ودزولي ايميل قالولي دزلنا بطاقة مدنيه او ليسن او جواز بس الطلب الغريب يبون فيزتي اصورها و ادزها ولا لأ والله خايف ياخوي ادزلهم الفيزا طلب غريب عجيب الصراحه وقالو لي دزه علي هاليميل eurofinance@euro.apple.com
    ادزه عادي ولا لأ ابي تفصيل وسلامتك

  22. طيب شلون لو بتعرف انه مفتوح او لاا ؟؟

  23. مرحبا انا مفكره اطلبه بس هل راح يكون مقفول لما ابي استخدمه هنى بالكويت لانى سمعت قبل انه يكون مقفول برا بريطانيا

  24. السلام عليكم ورحمة الله وبركاته ,,,

    صبحك الله بالخير عزيزي بو فلان .. وكل عام وأنتم بخير ^^

    كنت قد تحدثت معك مسبقا عن الطريقة التي تم الشراء بها من خلال ابل ستور البريطاني .. وتم التنويه من خلالكم أن المسالة قد تتطلب يوم أو يومان للموافقة .. وفعلا تم ارسال مجموعة تساؤلات على البريد الخاص (من باب تحسين خدمة العميل) تساؤلات عابرة .. وحينما تمت الاجابة عليها .. مرت ايام معدودة .. وفجأة .. تم رفض الطلب بحجة الالغاء وبحجة ايضا أن هناك مجموعة تساؤلات لم أجب عليها (علما أن طريقة الدفع ناجحة , واملك حساب بالارامكس) ولا يوجد أي معضلة على الاطلاق .. المعضلة الكبرى .. انه حتى في حال حاولت تكرار التجربة .. ماذا عن المبلغ الكبير الذي اقطع من الفيزا .. وعن كيفية التعاطل مع هذه المشكلة تحديدا .. فتكرار التجربة أمر سهل .. والفضل يعود بعد الله لك في ها الامر .. لكن مسألة المبلغ الذي اقطع في الاساس .. ما كيفية التعامل مع هذه المحنة .. وسأكون لك من الشاكرين … وما إن تطلب الامر نسخ رسالتهم التي وصلتني أو اي معلومة أخرى .. أنا حاضر الله يعافيك ^^

    • عاد تصدق يابومساعد الجهاز الي طلبته بالشرح كنسلوه 🙂

      لكني طالب غيره 6 اجهزة ووصلت عادي المهم ان الطلبية الي تنلغي ترجعلك فلوسها من ١٤ الى ٢١ يوم انا رجعلتي بعد ١٥ يوم بالضبط ترجع بالفيزا

  25. يعطيك العافية اخوي ابو فلان على الشرح
    الطيب

    لكن عندما تنتهي من الشراء كيف تسجل الخروج من موقع أبل??

    راجع هذا الرابط بارك الله بك

    http://www.justsmile.tv/2011/11/06/%d9%83%d9%8a%d9%81-%d8%aa%d8%b3%d8%ac%d9%84-%d8%a7%d9%84%d8%ae%d8%b1%d9%88%d8%ac-%d9%85%d9%86-%d9%85%d9%88%d9%82%d8%b9-%d8%a3%d8%a8%d9%84-signout-from-apple-com/

  26. لو سمحت أبي أعرف شقصدك يالضرايب وعلى وشو ياخذونها ؟؟
    وإذا شريت الجهاز أقدر أغير الستور لقطري أو اي دولة ثانية ؟؟
    وكيف أفتح لي صنروق في أرامكس ؟

    وششكـرااً 🙂

  27. أخوي ّأبوفلان ..

    تنصحني اطلب من برا انا بالسعوديه الرياض ..

    ودي أطلب آيفون 4 أس آبيض ..

    ووللعم مآ قد طلبت من برآ بس ودي أتعلم عمري 17 سنة ..

    وش رايك يبعونه جرير الكذابين بـ 4000 ريال سعودي ..؟

    فـ ودي أطلب من برآ ..

    س: هل يفررق الستور الأمريكي عن البريطاني وأيهم أفضل .؟
    س: والآيدي مآل اب ستور لآزم يصير زي الستور مثلاً يوم جيت أسجل الآيدي حطيت السعوديه .. هل فيه ضرر ولآ عآدي ..؟

    والله ثم والله على الله ثم علييك .. !

    لآ تتجآهلني ..

    • البريطاني مجربينه ويوافق ع التوصيل اما الأمريكي عادة يكنسل الطلب

      الآي دي استخدمه نفسه حق الآب ستور لان الاي دي واحد لكن ابل تعامل كل مكان غير يعني الآب ستور غير والستور للأجهزة غير حتى لو حسابك سعودي

  28. ..

    طيب تنصحني أطلب من برآ مع عمري هذآ ؟

    وكم يطلعلي تقريباً ؟؟

  29. السلام عليكم.. هل الستور الامريكي يوصل الطلبات لأرامكس وبدورها للكويت؟
    ولا لازم اطلب من الستور البريطاني؟

  30. عبدالله الخميس

    الله يعافيك يابوفلان،فعلا جشع غير طبيعي درس واضح ومفهوم

    قريبا باطلب بإذن الله

  31. السلام عليكم
    اخوي انا كل شي سويته تمام
    بس اخر شي لمن بدفع يقولي عملية الدفع انرفضة والفيزه مو مقبوله
    للعلم فيها فلوس اكثر من مطلوب , والفيزا فيزة الخير من بيت التمويل
    تتوقع ليش جذي ؟ لازم فيزا بريطانية ؟

  32. استفدت من الشرح شكرا لككم

  33. لقد حاولت طلب آيبود تش من الاستور البريطاني والامريكي الا انه تم رفض الفيزة مع اني ادخلت عنوان ارامكس فهل هناك من طريقة لقبول الفيزا؟؟
    وشكرا

  34. لو سمحت انا ماني متأكد يمكن اطلب الجهاز ويسير مثل قيمته الي في السوق ولالا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.